Qazaxda Novruz bayramı ilə əlaqədar keçirilən yarmarka bu gün də davam edib. Əvvəlki günlərdə olduğu kimi, bu gün də əhalinin tələbatına uyğun olaraq satışa müxtəlif çeşiddə məhsullar çıxarılıb.

Rayon əhalisinin kənd təsərrüfatı və ərzaq məhsulları ilə təminatını yaxşılaşdırmaq, əhalini ucuz və keyfiyyətli məhsullarla təmin etmək məqsədilə keçirilən yarmarkada bu gün də qələbəlik olub.

Artıq dördüncü həftədir ki, keçirilən yarmarkada rayon sakinləri üçün çeşidləri müxtəlif olan məhsulların satışı təşkil olunub. Keyfiyyətləri yüksək olan məhsulların qiymətləri bazarla müqayisədə 20-30 faiz ucuzdur. Yarmarkada quzu əti 8 manata, dana əti isə 6 manat 50 qəpiyə satılır. Ona görə də Novruz süfrəsi üçün lazım olan bütün məhsulları yarmarkadan ucuz qiymətə almaq olar.

Rayon sakinləri, eləcə də qonaqlar çeşidləri müxtəlif olan ərzaq və kənd təsərrüfatı, ət və ət məhsulları alıb, bayram bazarının xidmətindən yararlanıblar. Alış-veriş edən sakinlər qiymətlərin ucuz olmasından, məhsulların çeşidinin çoxluğundan razı qaldıqlarını bildirərək Novruz yarmarkasının keçirilməsinə görə Ölkə Başçısına minnətdarlıq ediblər.