Gürcüstan nümayəndə heyəti Qazaxda qonaq olub
KODA İcma Təhsil Mərkəzi (Gürcüstan) və "Gəncə Regional
Qadın Mərkəzi” İctimai Birliyi Avropa Birliyinin maliyyə dəstəyi, Almaniya Beynəlxalq
Əməkdaşlıq Cəmiyyətinin idarəçiliyi, Şərq Tərəfdaşlığı ölkələrinin Ərazi Əməkdaşlıq
Proqramının Azərbaycan-Gürcüstan arasında Ərazi Əməkdaşlıq Proqramı çərçivəsində
"İnkişaf və Əməkdaşlıq üçün Vətəndaş Cəmiyyəti: Azərbaycan və Gürcüstanın sərhəd
bölgələrində turizm potensialının artırılması” layihəsini Gəncə-Qazax regionunda
həyata keçirir. Gəncə, Qazax, Ağstafa, Tovuz, Şəmkir, Gədəbəy, Daşkəsən, Göygöl
rayonlarında "Fəaliyyət Planı”na əsasən ölkələr arasında mübadilə proqramı da həyata
keçirilir. 01-06 avqust 2018-ci il tarixlərdə layihə benefisarlarından
ibarət Azərbaycan nümayəndə heyəti Gürcüstanın Kvemo Kartli bölgəsində regionun
turizm məhsulları ilə tanış olmuşlar. Növbəti mübadilə proqramı isə Gürcüstan benefisarlarının
iştirakı ilə 30 avqust – 04 sentyabr 2018-ci il tarixlərində təşkil olunub. Azərbaycanın Gəncə-Qazax regionuna
təşkil olunmuş səfərin birinci gününün proqramına əsasən Gürcüstan nümayəndə heyəti
Qazax rayonunda qonaq olublar. Rayonumuzda qonaq olan nümayəndə heyətini Qazax Rayon
İcra Hakimiyyəti başçısının müavini Gulaya Həsənova, aparatın baş məsləhətçisi
Sərdar Orucov və digər məsul işçilər qarşılayıblar. Gürcü qonaqlar əvvəlcə Qazax rayonunun Daş Salahlı kəndi
yaxınlığındakı "Avey” dağının şərq ətəyində yerləşən "Damcılı mağarası” milli qoruğu
ilə tanış olublar. Bələdçi qonaqlara Damcılı mağarasının tarixi keçmişi
haqqında ətraflı məlumat verərək bildirib ki, "Avey” dağı ərazisində aşkar olunan
ən qədim daş dövrü insan məskənlərindən biri Damcılı açıq mağara düşərgəsidir. Sonra nümayəndə heyəti şəhərin mərkəzində yerləşən Qazax
Tarix-Diyarşünaslıq Muzeyində olaraq muzeydə olan qiymətli eksponatlarla yaxından
tanış olub, rayon haqqında ətraflı məlumat əldə ediblər. Qazaxdan çıxmış və müxtəlif sahələrin birinciləri
olan mütəfəkkirlərin şərəfinə salınmış "Fəxri qazaxlılar” parkı ilə tanış olan
qonaqlara Qazaxın saz, söz beşiyi olmasından, şairlər, aşıqlar yurdu kimi
tanınmasından söz açıblar. Səfər çərçivəsində torpaqlarımızın ərazi bütövlüyü
uğrunda həlak olan şəhidlərin xatirəsinə salınmış Şəhidlər Xiyabanı da ziyarət
olunub. Vətən uğrunda şəhid olan igid oğul və qızlarımızın əziz xatirəsi dərin
ehtiramla yad olunub. Ziyarət zamanı qonaqlara Qazax rayonunun öz torpaqları
uğrunda 285 şəhid verməsi, 7 nəfər Milli Qəhrəmanın və bu gün də 7 kəndinin
işğal altında olması haqqında geniş məlumat verilib. Daha sonra nümayəndə heyəti Qazax Müəllimlər seminariyası,
XIX əsrdə inşa edilən Qazax Cümə məscidinin və İsrafil ağa hamamının binası ilə
tanış olublar. Qonaqlara hər bir bina haqqında ətraflı şəkildə tarixi məlumatlar
çatdırılıb. Mübadilə proqramının növbəti məkanları isə Ağstafa,
Tovuz, Şəmkir rayonları və Gəncə şəhəridir. GOYEZEN.AZ
Facebook-da paylaş