Qazax rayonunda Novruz bayramı təntənəli şəkildə qeyd olunub

Novruz bayramı münasibətilə rayonumuzda ümumrayon şənliyi keçirilib. Qazax rayon İcra Hakimiyyətinin təşkilatçılığı ilə keçirilən Novruz şənliyi ilə əlaqədar Olimpiya İdman Kompleksinin qarşısı bayramsayağı, Novruz atributları ilə bəzədilib, səmənilər, xonçalar düzülüb, Novruzun rəmzi olan böyük tonqal çatılıb. Rayon sakinlərində xoş əhval-ruhiyyə yaradan Novruz bayramında minlərlə rayon sakini iştirak edib.

Qazax rayon İcra Hakimiyyəti Başçısının birinci müavini Məmməd Alıyev və aparatın məsul işçiləri, Bakıdan gəlmiş qonaqlar, hüquq-mühafizə orqanlarının rəhbərləri Novruz şənliyində iştirak etmək üçün Olimpiya İdman Kompleksinə gəliblər.

Bahar qız Məmməd Alıyevə Novruzun rəmzi olan səmənini təqdim etdikdən sonra tədbir start götürüb. Zurnaçıların, aşıqların baharı, Azərbaycanı tərənnüm edən mahnıları ətrafa yayılıb, bayram şənliyinin iştirakçılarında xoş ovqat yaradıb.

Novruzun rəmzi olan tonqal alovlandırıldıqdan sonra Qazax rayon İcra Hakimiyyəti Başçısının birinci müavini Məmməd Alıyev və qonaqlar bayram ovqatlı sərgilərə, bayramsayağı bəzənmiş süfrələrə, pəhləvanların, idmançıların və uşaqların maraqlı çıxışlarına, əl işlərindən ibarət nümunələrə, qədim məişət əşyalarına tamaşa ediblər. Adət-ənənələrimizə uyğun hazırlanmış Novruz təamları ilə tanış olub, ululardan bugünkü nəslə yadigar qalan qədim el sənətlərinin nümayişinə baxıb, aşıqların ifasında qədim el havalarını dinləyiblər.

Bayram şənliyində Kosa və Keçəlin zarafatları, Bahar qızın söylədikləri şeirlər, məzəli əhvalatlar, Novruzla bağlı adətlər, oxunan rəngarəng mahnılar və müxtəlif rəqslər rayon sakinlərinin və tamaşaçıların sevincinə səbəb olub.

Sonra tədbir Olimpiya İdman Kompleksinin içərisində davam etdirilib.

Aparıcı Afaq Gəncəli konsert proqramını açıq elan edərək tədbir iştirakçılarını bayram münasibətilə təbrik edib, rayon sakinlərinə ən xoş arzularını çatdırıb.

Rayon İcra Hakimiyyəti Başçısının birinci müavini Məmməd Alıyev çıxış edərək rayon İcra Hakimiyyətinin başçısı Rəcəb Babaşovun adından Novruz bayramı münasibətilə xalqımızı, bütün rayon sakinlərini səmimi qəlbdən təbrik edib, hər bir ailəyə sevinc, firavan günlər, əmin-amanlıq arzulayıb. Azərbaycan xalqının min illər boyu qəlbində yaşatdığı bu ən əziz günün - Bahar bayramının xalqımıza ruzi-bərəkət gətirməsini arzu edib.

Sonra Bakıdan rayonumuza dəvət olunmuş müğənnilər növbə ilə səhnədə yer alıblar.

Respublikanın Xalq artistlərindən Bilal Əliyev və Sabir Əliyevin oxuduğu bahar duyğulu mahnılar tamaşaçılar tərəfindən alqışlarla qarşılanıb.

Sonra səynəyə qazaxlı aşıqlardan Camoy Qurbanov, Yaşar Gülümcanov və Qoca Ərəbov çıxaraq qədim el havalarını ifa ediblər.

Əməkdar artistlərdən İlkin Əhmədov və Elza Seyidcahanın oxuduqları bir-birindən şən, şux mahnılar şənlik iştirakçılarında əsl bayram əhval-ruhiyyəsi yaradıb.

Gənc ifaçılardan Gülnar İsayeva və Tural Qismətin çıxışları da tamaşaçıların bayram sevincini daha da artırıb.

Qazaxlı meyxanaçılardan Əmir Qazaxlı və Mədət Tənha yeni ifalarını təqdim ediblər.

Tədbirdə əsgərlər müxtəlif hərbi bacarıqlarını nümayiş etdirib, nümunəvi fəndlər göstəriblər.

Qazax rayon İcra Hakimiyyətinin Bahar bayramı münasibətilə təşkil etdiyi konsert proqramı böyük ruh yüksəkliyi ilə başa çatıb.

Bayram şənliyində iştirak etmək üçün Bakıdan gəlmiş həmyerlilərimiz GOYEZEN.AZ saytına bayram tədbiri ilə bağlı təəssüratlarını bölüşüblər. Filologiya elmləri doktoru Alxan Bayramov, IV İslam Həmrəyliyi Oyunlarının Zorxana və pəhləvan güləşi üzrə gümüş mükafatçısı, Zoraxana idman növü üzrə Avropa və Dünya çempionu, sərbəst güləş üzrə Əməkdar məşqçi, Beynəlxalq dərəcəli hakim Tural Əliyev, şairlərdən Rəfail İncəyurd və Vəli Xramçaylı, gənc rəssam Akif Əmirov bu gün bayram şənliyində iştirak etməkdən çox məmnun olduqlarını bildiriblər. “Ürəyimiz dağa döndü. Bayram şənliyi çox yüksək şəkildə təşkil olunmuşdu. Qədim el adətimizi göstərmək üçün nə lazımdırsa, hamısı bugünkü tədbirdə var idi.

Konsertə isə söz ola bilməz. Respublikamızın sayılıb-seçilən müğənniləri bu gün burada çıxış etdilər və biz çox böyük həzz aldıq. Bizi bu gün bu tədbirə dəvət etdiyinə və belə yüksək səviyyəli bayram tədbiri təşkil etdiyinə görə rayon İcra Hakimiyyətinin başçısı Rəcəb Babaşova “Qazax Xeyriyyə” İctimai Birliyinin rəhbərliyi və üzvləri adından, Bakıda yaşayan bütün qazaxlılar adından öz dərin minnətdarlığımızı bildiririk”.