Ölkə başçısının “Biz birlikdə güclüyük” çağırışı hər birimiz üçün örnəkdir
Quşçu Ayrım kəndi Bildiyiniz kimi, dünyada
tüğyan edən koronavirus (COVID-19) infeksiyasının Azərbaycanda geniş
yayılmasının qarşısının alınması, insanların sağlamlığının qorunması ilə bağlı
dövlətimiz tərəfindən təxirəsalınmaz tədbirlər həyata keçirilir. Ölkə
Prezidenti İlham Əliyevin rəhbərliyi altında Azərbaycan Respublikası Nazirlər
Kabineti yanında Operativ Qərargah tərəfindən məqsədyönlü işlər görülür. Dövlət başçısının ölkəmizdə
koronavirus pandemiyasına qarşı mübarizə məqsədilə verdiyi qərarlar vətəndaşlarımız
tərəfindən böyük rəğbətlə qarşılanır, dövlətimizin başçısının xalqımıza
qayğısının bariz nümunəsi kimi qiymətləndirilir. Ölkə başçısının "Biz birlikdə
güclüyük” çağırışı isə bu gün hər birimiz üçün örnəkdir. Respublikamızın hər yerində
olduğu kimi, Qazaxda da "Biz birlikdə güclüyük” devizi altında keçirilən
xeyriyyə aksiyasına start verilib. "Gənc Könüllülər"in də fəal iştirak etdiyi, özündə birliyi, həmrəyliyi, ölkə vətəndaşına
sevgini, qayğını əks etdirən bu aksiyaya hər kəs ürəklə qatılıb və öz
töhfəsini verməyə çalışır. Bu gün Qazax Rayon İcra
Hakimiyyəti və "Carçıoğlu GROUP” MMC tərəfindən "Biz birlikdə güclüyük” devizi
altında reallaşan aksiya da dövlətin vətəndaşına olan qayğısının bariz nümunəsidir.
Qazax Rayon İcra Hakimiyyəti tərəfindən rayonun daim atəş altında olan, sərhəddə
yerləşən Quşçu Ayrım, Məzəm, Fərəhli,
Cəfərli, Bala Cəfərli kəndlərində yaşayan 516 ailəyə, "Carçıoğlu
GROUP” MMC tərəfindən 286 şəhid ailəsinə 1 kisə un və digər ərzaq yardımının
olunması dövlət qayğısının əyani sübutudur. Qazax Rayon İcra Hakimiyyətinin
başçısı Rəcəb Babaşov və "Carçıoğlu GROUP” MMC-nin əməkdaşları ərzaq yardımı
edilən Quşçu Ayrım və Məzəm kəndlərində olub, sakinlərlə görüşüblər. Kənd sakinlərini salamlayan
icra başçısı ölkəmizdə koronavirus pandemiyasının geniş yayılmasının qarşısının
alınması, əhalinin sağlamlığının qorunması ilə bağlı görülən işlərin xalqımız tərəfindən
yüksək qiymətləndirildiyini bildirib. Rayon rəhbəri qeyd edib ki, dövlət
başçısının və Azərbaycan Respublikasının Birinci vitse-prezidenti Mehriban
xanım Əliyevanın azərbaycanlıların hər zaman, xüsusilə çətin anlarda bir-birilərinə,
böyüklərimizə mərhəmətlə, qayğı və həssaslıqla yanaşılması ilə bağlı
çağırışlarına qoşularaq hər bir dövlət məmuru, iş adamı həmrəylik nümayiş
etdirməlidir. Bugünkü bu təşəbbüs də məhz xalqa, sadə vətəndaşlara olan qayğını
özündə əks etdirən bir təşəbbüsdür. İstər dövlətimiz, istərsə də iş adamları tərəfindən
vətəndaşlarımıza olan qayğı, dəstək bir daha onu göstərir ki, Azərbaycanda hər
zaman birlik, həmrəylik olub və bundan sonra da olacaqdır. İcra başçısı
bildirib ki, bu gün dövlətimiz tərəfindən sahibkarlara, iş adamlarına göstərilən
diqqət və qayğının nəticəsidir ki, onlar da dövlətinin, xalqının yanında olmağı
özlərinə borc bilirlər. Bunun bariz nümunəsi də "Carçıoğlu GROUP” MMC tərəfindən
atılan nümunəvi addımdır. Sakinlərə səmimi ürək sözlərini
çatdıran rayon rəhbəri onları bir daha koronavirus pandemiyası ilə əlaqədar ölkəmizdə
tətbiq olunan xüsusi karantin rejiminin tələblərinə ciddi riayət etməyə çağırıb. Quşçu Ayrım kənd sakini Misir
Dünyamalıyev, Məzəm kənd sakinləri şəhid anası Tamella Süleymanova, Məmməd Əliyev, Nəriman Məmmmədov, Süleyman
Süleymanov, Bala Cəfərli kənd sakini Ceyhun Rəhimov, Qarabağ qazisi Kamil Musavi və başqaları çıxış edərək sərhəddə
yaşayan insanlara, şəhid ailələrinə göstərilən diqqət və qayğıya görə ölkə
başçısı İlham Əliyevə və rayon rəhbərliyinə minnətdarlıqlarını bildiriblər.
Onları diqqətdə saxlayıb bu xeyirxah təşəbbüsü həyata keçirən "Carçıoğlu GROUP”
MMC-nin direktoru Elçin Carçıyevə və kollektivinə təşəkkürlərini çatdırıblar.
Çıxış edənlər qeyd ediblər ki, bu gün biz bir daha şahidi olduq ki, doğrudan da
ölkə başçısının özünün də söylədiyi kimi o, hər bir vətəndaşın Prezidentidir.
Çıxış edənlər ölkə rəhbərinin "Biz birlikdə güclüyük” çağırışına səs verərək iş
adamlarının, sahibkarların xalqın yanında olmasını, dövlətə sadiqlik nümayiş
etdirməsini yüksək qiymətləndiriblər. Bu cür təşəbbüsün hər bir vətəndaşımıza,
o cümlədən də imkanlı şəxslərə nümunə olduğunu diqqətə çatdırıblar. Quşçu Ayrım kəndi Məzəm kəndi Bala Cəfərli kəndi GOYEZEN.AZ
Facebook-da paylaş