İcra başçısı Kosalar kənd tam orta məktəbində olub
Bu gün sevindirici haldır ki, ölkə Prezidenti İlham
Əliyevin təhsil sahəsinə olan diqqət və qayğısı təkcə paytaxt Bakını deyil,
respublikamızın bütün bölgələrini əhatə edir. Regionların sosial-iqtisadi inkişafı
ilə bağlı qəbul edilmiş Dövlət Proqramlarında yeni təhsil ocaqlarının, çoxsaylı
məktəblərin inşa olunması, yaxud da əsaslı şəkildə yenidən qurulması kimi
bəndlərin öz əksini tapması bu sahəyə olan dövlət qayğısından xəbər verir. "Azərbaycan Respublikası regionlarının
2019–2023-cü illərdə sosial-iqtisadi inkişafı Dövlət Proqramı”nın həyata
keçirilməsi üzrə hazırlanmış tədbirlər planına Qazax rayonu üzrə də təmirə ehtiyacı
olan 11 məktəb salınıb. Bu, dövlət tərəfindən bölgələrimizdə təhsil sahəsinə
olan yüksək diqqət və qayğının Qazaxın timsalında daha bir bariz nümunəsidir. Xəbər verdiyimiz kimi, hazırda həmin
məktəblərdən biri - Xalq yazıçısı
İsmayıl Şıxlının adını daşıyan 1176 şagird yerlik Kosalar
kənd tam orta məktəbi Heydər Əliyev Fondu tərəfindən əsaslı şəkildə yenidən
qurulur. Artıq 6 aydır ki, böyük bir tikinti meydançasını xatırladan məktəbdə
əsaslı tikinti işləri arxada qalıb.
Bu gün Qazax Rayon İcra Hakimiyyətinin
başçısı Rəcəb Babaşov Kosalar kənd
tam orta məktəbində görülən işlərin mövcud vəziyyəti ilə maraqlanıb. Rayon rəhbərinə hazırki işlər barədə məlumat verilərək bildirilib
ki, demək olar ki, son tamamlanma işləri görülür. Məktəb binasında bütün qapı
və pəncərələr qoyulub. Otaqlarda tavanda işıqlanma və rənglənmə işləri başa
çatıb. Həmçinin döşəməyə keramoqranit vurulması da yekunlaşıb. Binanın xarici
fasadında suvaq yekunlaşan hissələrdə nəzərdə tutulan yerlərə aqlay vurulması
işi həyata keçirilir. Bundan əlavə, məktəbin həyətinə giriş qapısı və
hasararası məhəcərlər qoyulub. Akt zalı, yeməkxana və idman zalında da xeyli
işlər görülüb və sürətlə davam etdirilir. Bundan başqa, məktəb binasının arxa
hissəsində tikilən hər birinin həcmi 154 kubmetr olan 2 ədəd yanğından
mühafizə, bir ədəd içməli su hovuzu, nasosxana, qazanxanada da son tamamlanma
işlərinin aparıldığı qeyd edilib. Kənd sakinlərinin, xüsusilə də idmançıların,
güləşçilərin istəyini nəzərə alaraq məktəbin həyətində arxa hissədə əlavə
olaraq tikilən güləş zalının inşasının da uğurla həyata keçirildiyi vurğulanıb. Sonra rayon rəhbəri təmir müddətində şagirdlərin dərsi
üçün nəzərdə tutulan, məktəbin yaxınlığında yerləşən və tam hazır olan yardımçı
binaya da baxış keçirib. Sinif otaqlarında dərs alan şagirdlərlə görüşüb. İcra
başçısına məlumat verilib ki, birinci mərtəbəsində 8, ikinci mərtəbəsində isə 9
sinif otağı yerləşən ikimərtəbəli yardımçı binada müəllim və şagirdlər üçün hər
cür şərait yaradılıb. Hazırda səhər növbəsində 12, günorta növbəsində 11 sinif
olmaqla şagirdlər yeni binada təhsil alır. Səhər növbəsində I, IV, VII, VIII,
IX, X, XI siniflər, günorta növbəsində isə II, III, V, VI siniflər tədrislə
məşğul olur. Məlumat üçün onu da qeyd edək ki, hazırda Qazaxda daha
iki məktəb üçün yeni inzibati binalar inşa olunur. Belə ki, Heydər Əliyev Fondu
tərəfindən Ş.Nəsibova adına Sarıvəlli kənd tam orta məktəb üçün 220 şagird
yerlik, Təhsil Nazirliyi tərəfindən isə A.Məmmədov adına Qaymaqlı kənd tam orta
məktəb üçün 180 şagird yerlik yeni binaların inşasına başlanılıb.
GOYEZEN.AZ
Facebook-da paylaş