Məntəqələr bələdiyyə seçkilərinə tam hazırdır
Yerli
əhəmiyyətli sosial-iqtisadi, ekoloji, sosial müdafiə sahələrində işlərin həyata
keçirilməsində bələdiyyələrin üzərinə mühüm vəzifələr düşür. Odur ki, insanlar
bu quruma seçkilər keçirəndə elə namizədlərə səs vermək istəyirlər ki, onlar bu
etimadı doğrulda bilsinlər. Dekabrın 23-də keçiriləcək növbəti bələdiyyə
seçkilərinə də xalq ən layiqli namizədlərini irəli sürür ki, onlar gələcəkdə
sakinlərin etimadını doğrulda bilsinlər. Respublikamızın
hər yerində olduğu kimi, Qazax rayonunda da bu məsələyə çox həssaslıqla
yanaşılır. Bunu 107 saylı Qazax Seçki Dairəsində olarkən bir daha yəqin etdik.
Dairə seçki komissiyasının sədri Xəyyam Salehov dedi ki, bütün məntəqələr
seçkilərə tam hazır vəziyyətdədir. Dekabrın 23-də 36 seçki məntəqəsi fəaliyyət
göstərəcəkdir. Bu məntəqələrdə də 45 min 306 seçici istədiyi namizədə səs
verəcəkdir. Seçkilərin şəffaflığını təmin etmək üçün 10 məntəqədə veb-kamera
quraşdırılmışdır. Əvvəlki
seçkilərdən fərqli olaraq bu dəfə namizədlərin sayı xeyli çoxdur. Dairə üzrə 14
bələdiyyəyə 136 üzv seçilməlidir. Namizədlərin sayı isə 453-dür. Onlar əsasən Yeni
Azərbaycan Partiyası, Böyük Qurtuluş Partiyası, Bütöv Azərbaycan Xalq Cəbhəsi
Partiyası, Milli Dirçəliş Partiyası, Sosial Demokrat Partiyası və Sosial Rifah
Partiyasıdır. Seçkiləri müşahidə etmək üçün 472 nəfər qeydiyyatdan keçmişdir. Qeyd
edək ki, seçici siyahısı dəqiqləşdirildikdən sonra bildirişlər paylanmışdır.
Dairəni əhatə edən məntəqələrdə ilk dəfə səs verəcək gənclər
müəyyənləşdirilmiş, onlarla keçirilən görüşdə seçkilərin əhəmiyyəti barədə
maraqlı diskussiyalar aparılmışdır. Dairədə
100 yaşı haqlamış insanların da siyahısı tutulmuşdur. Yaşının çoxluğuna görə
birinci yerdə 112 yaşlı Sayalı Nəbiyeva dayanır. Söhbət zamanı Sayalı nənə dedi
ki, ömrümdə çox seçkilərdə iştirak etmişəm. Lakin müstəqil respublikamızda
keçirilən seçkilər məndən ötrü əzizdir. Odur ki, 1993-cü ildən bəri keçirilən
bütün seçkilərdə fəallıq göstərmişəm. Bilirəm ki, mənim səsim ölkəmizdə
sabitliyə və əmin-amanlığa lazımdır. Odur ki, dekabrın 23-də məntəqəyə gəlib
mən də səs verəcəyəm. Sabir ƏLİYEV, "Azərbaycan” qəzetinin bölgə müxbiri 21 dekabr 2019-cu il
Respublika mətbuatı Qazax haqqında
Facebook-da paylaş