Qazaxda 22 Noyabr - ədliyyə işçilərinin peşə bayramı qeyd olunub
Bu gün Azərbaycanın ədliyyə orqanlarının
yaranmasının 101 illiyi tamam olur. Xalqımızın Ümummilli Lideri Heydər Əliyevin
2000-ci il 11 noyabr tarixli Sərəncamı ilə hər il noyabrın 22-si ölkəmizdə ədliyyə
işçilərinin peşə bayramı kimi qeyd edilir. Respublikamızın hər yerində olduğu kimi, Qazaxda da
ədliyyə işçiləri peşə bayramlarını qeyd ediblər. Bu münasibətlə Qazax Rayon
İcra Hakimiyyətində tədbir keçirilib. Tədbirdə icra aparatının məsul şəxsləri,
hüquq-mühafizə orqanlarının,
idarə, müəssisə və təşkilatların rəhbərləri, məhkəmə, ədliyyə işçiləri, məktəb
direktorları, KİV nümayəndələri
iştirak ediblər. Tədbir iştirakçıları əvvəlcə müstəqil
Azərbaycan dövlətinin qurucusu və memarı olan Ümummilli Lider Heydər Əliyevin
adını daşıyan parkda ucaldılan abidəsini ziyarət edib, önünə gül dəstələri
düzüb, əziz xatirəsini ehtiramla anıblar. Dahi şəxsiyyətin adını daşıyan Mərkəzdə
müstəqil Azərbaycanın çiçəklənməsi naminə həyata keçirdiyi misilsiz xidmətlərə
bir daha nəzər salıblar.
Qazax Rayon İcra
Hakimiyyətinin akt zalında keçirilən tədbiri icra başçısı Rəcəb Babaşov giriş
sözü ilə açaraq Azərbaycan ədliyyəsinin yaranmasının
101 illiyi və ədliyyə işçilərinin peşə bayramları münasibətilə bütün ədliyyə və məhkəmə orqanlarının işçilərinitəbrik edib, xoş arzularını çatdırıb. Azərbaycan ədliyyəsinin şanlı tarixindən və inkişaf
yolundan, Ümummilli Lider Heydər Əliyevin Azərbaycana rəhbərliyinin bütün dövrlərində
ədliyyə sisteminə göstərdiyi diqqət və qayğıdan, cənab Prezident İlham Əliyevin
tapşırıqları ilə aparılan ədliyyə və məhkəmə islahatlarından, rayonda aparılan
abadlıq və quruculuq işlərindən danışıb. Rayon rəhbəri Azərbaycan ədliyyəsinin davamlı inkişafı
üzrə həyata keçirilən tədbirlərin və qazanılan nailiyyətlərin Prezident İlham
Əliyevin təşəbbüsü və rəhbərliyi ilə reallaşdırılan genişmiqyaslı işlərin
göstəricisi olduğunu vurğulayıb. O, dövlət başçısının rəhbərliyi ilə Azərbaycan
ədliyyəsinin və məhkəmə-hüquq sisteminin mütərəqqi islahatlar aparılmaqla
təkmilləşdiyini, səlahiyyətlərinin xeyli genişləndiyini, cəmiyyətdə yerinin və
rolunun əhəmiyyətli dərəcədə artdığını bildirib. Ədliyyə orqanlarının qanunun
aliliyinin və insan hüquqlarının qorunmasında, şəffaflığın və ictimai
iştirakçılığın təmin olunmasında mühüm fəaliyyətini qeyd edib. Qazax
Rayon Məhkəməsinin hakimi Nemət Musayev çıxış edərək müasir Azərbaycan
dövlətçiliyinin banisi, xalqımızın Ümummilli Lideri Heydər Əliyevin 11 noyabr
2000-ci il tarixli Sərəncamı ilə təsis edilmiş 22 noyabr - ədliyyə işçilərinin peşə bayramı
gününün artıq 19 ildir ki, ədliyyə və məhkəmə orqanlarında böyük ruh yüksəkliyi
ilə geniş qeyd olunduğunu bildirib. Azərbaycan ədliyyəsinin yaranma tarixindən,
keçdiyi keşməkeşli yoldan söz açan hakim qeyd edib ki, müasir Azərbaycan ədliyyəsinin
yaranması - Şərqdə ilk demokratik respublika olan Azərbaycan Xalq Cümhuriyyətinin
elan olunması ilə eyni günə - 1918-ci il mayın 28-nə təsadüf edir. Bu,
Cümhuriyyətin ədliyyə fəaliyyətinə xüsusi əhəmiyyətinin göstəricisi idi. Həmin
tarixdən başlayaraq, Azərbaycan ədliyyəsi böyük və sürətli inkişaf yolu keçib,
mühüm nailiyyətlər qazanıb. Belə ki, ədliyyə orqanları və məhkəmələrin fəaliyyəti
ilə bağlı bir sıra qərarlar qəbul edilib, o cümlədən 1918-ci il noyabrın 14-də
Azərbaycan Məhkəmə Palatasının Əsasnaməsi, noyabrın 22-də isə Ədliyyə
Nazirliyinin Əsasnaməsi təsdiq edilib. Azərbaycanda ilk Ədliyyə naziri Xəlil bəy
Xasməmmədov, daha sonra Fətəli xan Xoyski, Teymur bəy Makinski, Aslan bəy Səfikürdski
yüksək postda təyinat alıblar. AXC dövründə qurumun sonuncu rəhbəri yenidən Xəlil
bəy Xasməmmədov olub. 1920-ci ilin aprelində Azərbaycan Xalq
Cümhuriyyəti süqut etdikdən sonra inqilab komitəsinin 1920-ci il 13 may tarixli
qərarı ilə Ədliyyə Nazirliyi ləğv edilib. Yeni yaradılan Xalq Ədliyyə
Komissarlığının səlahiyyətlərinə qanunvericilik layihələrinin hazırlanması,
məhkəmə işçilərinin seçilməsi, təlimatlandırılması və onlara inzibati rəhbərlik
edilməsi, qanunçuluğa ali nəzarət və istintaqın aparılması daxil edilib. Lakin
1930-cu ildə bu komissarlıq ləğv edilərək onun funksiyaları prokurorluq, Ali
Məhkəmə, Mərkəzi İcraiyyə Komitəsinə və digər orqanlara verilib. 1933-cü ildə məhkəmələrin,
prokurorluğun, istintaqın birləşdirilməsi, vahid məhkəmə siyasətinin həyata
keçirilməsi, bütün hakimiyyət orqanlarının, təsərrüfat müəssisələrinin, ictimai
birliklərin və fiziki şəxslərin hərəkətlərinin qanuniliyini müşahidə etmək
məqsədilə Xalq Ədliyyə Komissarlığı yenidən təşkil edilib. Lakin 1937-ci ildə
Xalq Ədliyyə Komissarlığının yeni təsdiq edilən Əsasnaməsi ilə bu qurumun
səlahiyyətləri xeyli məhdudlaşdırılıb, əsas fəaliyyət sahəsi məhkəmə və
notariat orqanlarının işinin təşkili və onlara rəhbərlik etməkdən ibarət olub.
1959-cu ildə Ədliyyə Komissarlığı yenidən ləğv edilib, məhkəmə orqanlarının
fəaliyyətinə rəhbərlik və nəzarət, məhkəmə statistikasının aparılması Ali
Məhkəməyə həvalə olunub, Nazirlər Soveti yanında Hüquq Komissiyası təşkil
edilib. Bununla da Ədliyyə Komissarlığının səlahiyyətləri ayrı-ayrı dövlət
orqanları arasında bölüşdürülüb. N.Musayev qeyd edib ki, Azərbaycanda Ədliyyə
sisteminin intibahı, Ədliyyə Nazirliyinin yenidən və əsaslı surətdə təsis
olunması Ümummilli Lider Heydər Əliyevin Azərbaycana birinci rəhbərliyi dövrünə
təsadüf edir. Belə ki, 1970-ci il oktyabrın 27-də Azərbaycan SSR Ali Sovetinin
qərarı ilə Ədliyyə Nazirliyi təsis olunaraq sabit fəaliyyəti təmin edilib,
nazirlik məhkəmə orqanlarına təşkilati rəhbərliyi həyata keçirib, əhaliyə
hüquqi yardımı yaxşılaşdırıb, notariat fəaliyyətinin və məhkəmə
ekspertizalarının aparılmasını təmin edib. Ümumiyyətlə, ədliyyə işi
təkmilləşdirilərək onun gələcək inkişafı üçün əlverişli zəmin yaranıb.
Azərbaycan ədliyyəsi ölkəmizin dövlət müstəqilliyinin bərpasından sonra da Ulu
Öndər Heydər Əliyevin diqqətindən kənarda qalmayıb. Belə ki, 1993-cü ildə
hakimiyyətə qayıdışından sonra Ümummilli Liderin rəhbərliyi ilə ədliyyə
sisteminin inkişafını təmin edən ardıcıl və məqsədyönlü islahatlar həyata
keçirilib, nazirliyin səlahiyyətləri genişlənib, cəmiyyətdə rolu artıb. 2006-cı ildə Azərbaycan Prezidenti
İlham Əliyevin təşəbbüsü ilə ədliyyə orqanlarının fəaliyyəti ilə bağlı bir sıra
mühüm sənədlər qəbul olunub, nazirliyə vəzifələr həvalə edilib, strukturu
təkmilləşdirilib. Müstəqillik dövründə ilk dəfə olaraq - dövlət başçısının
2006-cı il 18 aprel tarixli Fərmanı ilə Ədliyyə Nazirliyi haqqında Əsasnamə
təsdiq edilərək ona hüquq-mühafizə orqanı statusu verilib. Habelə "Ədliyyə
orqanlarında qulluq keçmə haqqında” Azərbaycan Respublikasının 2006-cı il 26
may tarixli Qanunu qəbul olunub və Respublika Prezidenti tərəfindən "Ədliyyə
orqanlarının inkişafı haqqında” 2006-cı il 17 avqust tarixli Fərman imzalanıb. Ölkə
başçısının 2009-cu il 6 fevral tarixli Sərəncamı ilə "Azərbaycan ədliyyəsinin
inkişafına dair 2009-2013-cü illər üçün Dövlət Proqramı” təsdiq edilərək həyata
keçirilib. Hakim vurğulayıb ki, Prezident İlham
Əliyevin "Elektron məhkəmə” informasiya sisteminin yaradılması haqqında”
2014-cü il 13 fevral tarixli Sərəncamı ölkəmizdə dövlət xidmətlərinin həyata
keçirilməsində informasiya-kommunikasiya texnologiyalarından istifadə olunması,
innovativ həllərin tətbiqi dövlət siyasətinin prioritetlərindən biri olmaqla
elektron hökumətin inkişafı və rəqəmsal hökumətə keçid ilə bağlı mühüm addımlar
atılması baxımından son dərəcə əhəmiyyətli oldu. Məhkəmə sisteminə elektron
idarəetmənin daha mütərəqqi tətbiqi baxımından bu layihə Avropa Şurasının
"Ədliyyənin Kristal Tərəzisi” müsabiqəsinin mükafatına layiq görülüb. N.Musayev qeyd edib ki, dövlət
başçısının təşəbbüsü ilə yaradılmış və artıq bütün dünyada Azərbaycan brendi
kimi məşhurlaşmış "ASAN xidmət” mərkəzlərində fəaliyyət göstərən notariat və
qeydiyyat orqanları tərəfindən aparılan əməliyyatların və verilən sənədlərin böyük
hissəsi məhz ədliyyə qurumlarının payına düşür. Xüsusi qeyd olunmalıdır ki, bu
gün ədliyyənin bütün sahələrində elektron xidmətlərin, müasir texnologiyaların
və innovasiyaların tətbiqinə böyük diqqət yetirilir. Səyyar xidmətlərə
tələbatın artması ilə əlaqədar nazirlik tərəfindən hazırlanan və elektron
notariat informasiya sisteminə və aidiyyəti məlumat banklarına birbaşa çıxışı
olan "Elektron notariat çantası” vasitəsilə istənilən yerdə hər hansı notariat
hərəkətini aparmaq və sənədləri çap edib, təqdim etmək mümkündür. Xüsusi vurğulamaq
lazımdır ki, dövlət başçısının Azərbaycan ədliyyəsinə yüksək diqqət və
qayğısının daha bir nümunəsi də bu sahədə çalışan əməkdaşların mütəmadi qaydada
təltif olunmasıdır. Ötən il Azərbaycan ədliyyəsinin yaranmasının 100 illiyi
münasibətilə Prezident İlham Əliyevin imzaladığı sərəncamlarla 68 nəfərin
yüksək fəxri adlar, ali xüsusi rütbələr, orden və medallarla təltif edilməsi,
eləcə də ötən gün təltiflərlə bağlı növbəti Sərəncamın imzalanması bu ali
diqqətin bariz nümunələrindən biridir. Bu yüksək diqqət və qayğı ölkəmizdə
ədliyyə sahəsində daha böyük uğurların əldə olunacağına qəti inam yaradır. N.Musayev peşə bayramlarını böyük ruh yüksəkliyi ilə qeyd edən
ədliyyə işçilərinin Prezident İlham Əliyevin ətrafında sıx birləşərək bundan
sonra da böyük səy və yüksək məsuliyyət hissi ilə çalışaraq xalqımıza şərəflə
xidmət edəcəklərinə, ölkəmizin müasir inkişafına uyğun olaraq öz vəzifələrini
hər zaman layiqincə yerinə yetirəcəklərinə əminliyini qeyd edib. Rayon Prokuroru
Əlirza Babayev, Polis
şöbəsinin rəisi Ədalət Əliyev, Azərbaycan Yazıçılar Birliyi Qazax zona filialının
sədri, Əməkdar incəsənət xadimi, şair Barat Vüsal çıxış
edərək ədliyyə və məhkəmə orqanlarında çalışan bütün əməkdaşları Azərbaycan
ədliyyəsinin 101 illik yubileyi və əlamətdar gün münasibətilə təbrik ediblər.
Geniş səlahiyyətlərə malik olan Ədliyyə Nazirliyinin demokratik cəmiyyətin
qurulmasında böyük pay sahibi olduğunu diqqətə çatdırıblar. Onlara qanunun
aliliyinin və insan hüquqlarının təmin olunması kimi gərəkli fəaliyyətlərində
uğurlar arzulayıblar. Sonda "22 Noyabr - ədliyyə işçilərinin peşə bayramı
günü münasibətilə və əmək funksiyalarını peşəkarlıq səviyyəsində yerinə
yetirdiklərinə görə” ədliyyə işçilərinin bir qrupuna Qazax Rayon İcra
Hakimiyyəti başçısının Fəxri Fərmanları təqdim edilib. Fəxri Fərmana layiq görülmüş Qazax
Rayon Məhkəməsinin hakimi Nemət
Musayev, Rayon Məhkəməsi aparatında böyük mütəxəssis Fəridə
Qocayeva və məsləhətçi Leyla Həsənova onlara göstərilən yüksək
diqqət və qayğıya görə rayon rəhbərliyinə minnətdarlıqlarını çatdırıblar. Qazax Rayon İcra
Hakimiyyətinin başçısı Rəcəb Babaşov tədbirə yekun
vuraraq ədliyyə işçilərini peşə bayramları münasibətilə
bir daha səmimi qəlbdən təbrik edib, müstəqil, suveren dövlət olan Azərbaycanın
bundan sonra da yüksəklərdə olması naminə gördükləri bütün işlərdə uğurlar
arzulayıb.
GOYEZEN.AZ
Facebook-da paylaş