Qazaxlı məktəblilər artıq 3 ildir ki, bu ənənəni davam etdirirlər
Bu gün düşmənlə 168 km məsafədə sərhəddi
olan Qazax rayonunun Bağanıs
Ayrım, Xeyrımlı, Barxudarlı, Sofulu, Qızılhacılı, Yuxarı Əskipara və Aşağı Əskipara kimi 7 kəndi düşmən tapdağı altındadır.
5 kəndi isə daim düşmən gülləsinin atəşinə məruz qalır. Vətən torpaqlarının ərazi
bütövlüyü uğrunda 280-dən artıq şəhid verən, 7 nəfər igid oğlu Azərbaycanın
Milli Qəhrəmanı adına layiq görülən Qazaxda igid oğul və qızlarımızın xatirəsi
hər zaman əziz tutulur. Şəhidlərimizə, onların ailə üzvlərinə olan qayğı həmişə
yüksək səviyyədədir.Qazax Rayon İcra Hakimiyyətinin başçısı Rəcəb Babaşovun fəaliyyətə başladığı
ilk gündən şəhidlərimizin ailə üzvlərinə daim
qayğı ilə yanaşması, şəhidlərimizin uyuduğu qəbiristanlıqların, onların xatirəsinə
ucaldılmış abidələrin, parkların, bulaqların, xiyabanların abadlaşdırılması,
yenilənməsi, əsaslı şəkildə təmir edilməsi bunun bariz nümunəsidir. Şəhərin mərkəzində
yerləşən Şəhidlər xiyabanı, orada aparılan abadlıq işləri, ən əsası da şəhidlərimizin
adı və şəkli əks olunmuş lövhənin vurulması bu istiqamətdə görülən işlərin daha
bir əyani sübutudur. 2017-ci
ildə isə yeni dərs ili ərəfəsində Rayon İcra Hakimiyyətinin başçısı Rəcəb Babaşovun
təşəbbüsü ilə Qazaxda daha bir ənənənin əsası qoyuldu. Qərara alındı ki, məktəblilər
hər yeni dərs ilinə Şəhidlər xiyabanını ziyarətlə başlasınlar. Bu ənənənin əsasının
qoyulmasında əsas məqsəd böyüməkdə olan gənc nəsildə milli vətənpərvərlik
ruhunu daha da inkişaf etdirmək, məktəblilərin mübariz ruhda tərbiyə olunmasını
təmin etməkdir. Rayon
rəhbərliyi tərəfindən əsası qoyulan həmin ənənə bu il də davam etdirilib. RİHB
Aparatının məsul işçiləri, hüquq-mühafizə orqanlarının, idarə, müəssisə və təşkilatların
rəhbərləri, təhsil işçiləri, onbirinci və birinci siniflərdə təhsil alan
şagirdlər, müəllimlər, ziyalılar, ağsaqqallar Şəhidlər xiyabanında şəhidlərin əziz
xatirəsini yad edib, memorial önünə gül dəstələri düzüblər. Şəhidlərin
ruhuna fatihə surəsi oxunduqdan sonra əziz xatirələri bir dəqiqəlik sükutla yad
edilib.
Qazax
Rayon İcra Hakimiyyəti başçısının birinci müavini Məmməd Alıyev giriş sözü ilə
çıxış edərək bütün tədbir iştirakçılarını salamlayıb, yeni tədris ilinin
başlanması münasibətilə müəllim və şagirdləri, valideynləri təbrik edib, ən səmimi
arzularını çatdırıb. Bildirib ki, artıq 3 ildir ki, biz bu müqəddəs məkanı
ziyarət edirik. Vətən uğrunda canından keçək igid və mərd oğullarımızı, qızlarımızı
bu gün burada bir daha yad etməklə şəhidlərə olan ehtiramımızı bildiririk. Bu
müqəddəs məkanı ziyarət etməklə, Vətənə, xalqa, dövlətə sadiqliyimizi nümayiş
etdirməklə yanaşı, şəhidlərimizə olan mənəvi borcumuzu qaytarırıq. Çünki şəhidləri
yad etmək, onların xatirəsini anmaq hər bir insanın vətəndaşlıq borcudur. M.Alıyev
qeyd edib ki, 3 ildir ki, davam etdirilən ənənənin əsas məqsədi Vətən
torpaqlarının ərazi bütövlüyü uğrunda canından keçən şəhidlərin keçdiyi ömür
yolunu bugünkü gənc nəslə nümunə göstərmək, hər bir gəncə mərd və mübariz böyüməli,
Vətənin müdafiəsinə hər an hazır olmalı, əgər lazım gələrsə öz canından keçməyi
belə bacarmalı olduğunu çatdırmaqdır. Ənənə halını alan bu tədbir hər bir uşaq
və yeniyetmənin yaddaşında əbədi iz qoyacaq, onların qəlbində Vətənə məhəbbət və
şəhidlərə ehtiram hissini daha da artıracaq.
M.Alıyev təhsil
sahəsinin ildən-ilə inkişaf etməsində Ümummilli Lider Heydər Əliyevin əsasını
qoyduğu dövlət siyasətinin bu gün də mühüm əhəmiyyət daşıdığını bildirib. Qeyd
edib ki, "Təhsil millətin gələcəyidir” ifadəsini şüar səviyyəsinə
yüksəldən Ulu Öndər respublikanın gələcək inkişafının məhz təhsillə bağlı
olduğunu vurğulamış və rəhbərlik etdiyi bütün dövrlərdə Azərbaycanda təhsilin
inkişafına xüsusi qayğı ilə yanaşmışdır. İstər Azərbaycan Respublikasına
rəhbərlik etdiyi 70-80-ci illərdə, istərsə də müstəqil Azərbaycan
Respublikasına rəhbərlik etdiyi illərdə təhsil prioritet sahə olaraq diqqət mərkəzində
olmuşdur. Birinci müavin bildirib ki, həmin qayğı bu gün də hiss olunmaqdadır.
Heydər Əliyev siyasətinin layiqli davamçısı Prezident İlham Əliyev də ölkədə
təhsil siyasətini uğurla davam etdirərək "Neft kapitalını insan kapitalına
çevirək" devizi altında təhsilin inkişafına böyük önəm verməkdədir. Dövlət
başçısının təhsil sahəsinin inkişafı naminə atdığı addımlar, müxtəlif illərdə
qəbul olunmuş Dövlət Proqramları bir daha onu sübut edir ki, bu gün təhsil
sahəsinə qoyulan investisiya Azərbaycanın gələcək inkişafına qoyulan investisiyadır.
M.Alıyev təhsil sahəsinin
inkişafında misilsiz xidmətləri olan Heydər Əliyev Fondunun gördüyü işlərdən də
söz açıb. Birinci vitse-prezident Mehriban Əliyevanın qayğısı sayəsində Fondun
"Yeniləşən Azərbaycana yeni məktəb” layihəsi çərçivəsində respublikanın hər
yerində olduğu kimi rayonumuzda da təhsil müəssisələrinin maddi-texniki
bazasının möhkəmləndirilməsi, yeni məktəb binalarının inşası ilə bağlı görülən
işlərdən danışıb. 5 illik Dövlət Proqramına Qazax rayonu üzrə 11 məktəb
binasının əsaslı təmir olunmasının salındığını bildirib. Həmin proqramda təmiri
nəzərdə tutulan məktəblərdən birinin Xalq yazıçısı İsmayıl Şıxlının adını
daşıyan 1176 şagird yerlik Kosalar kənd tam orta məktəbin istismara yararsız
olmasının nəzərə alınaraq Heydər Əliyev Fondu tərəfindən əsaslı təmir
olunduğunu bildirib. Bundan başqa, həmin Dövlət Proqramında əksini tapan daha
bir məktəbin - Ş.Nəsibova adına Sarıvəlli kənd tam orta məktəbin də Fond tərəfindən
əsaslı tikintisinin nəzərdə tutulduğunu və yaxın günlərdə təmirinə başlanılacağını
vurğulayıb. Təhsil sahəsinə göstərilən diqqət və qayğıya görə ölkə başçısına,
Birinci vitse-prezidentə, eləcə də rayon rəhbərliyinə bütün təhsil işçiləri
adından bir daha öz minnətdarlığını bildirib. Rayon Təhsil şöbəsinin müdiri
Nizaməddin Babanlı çıxış edərək yeni tədris ilinin başlanması münasibətilə təbriklərini
çatdırıb, bütün təhsil işçilərinə uğurlar arzulayıb. Yeni tədris ilində məktəblərdə
keçiriləcək vətənpərvərlik tədbirlərinə məhz bu müqəddəs məkanı ziyarətlə start
verildiyini diqqətə çatdırıb. Builki nəticələr
barədə məlumat verən N.Babanlı 2018-2019-cu tədris ilində Qazax rayonunun
ümumtəhsil məktəblərini bitirən 701 məzundan 488 nəfərin
ali və orta ixtisas məktəblərinə keçirilən imtahanlarda iştirak etmək üçün sənəd
verdiyini bildirib. Həmin məzunlardan 305 nəfərin
dövlət ali məktəblərinə, 14 nəfərin isə xüsusi təyinatlı
ali məktəblərə qəbul olduğunu qeyd edib. Cari ilin məzunlarından 319 nəfər, əvvəlki
illərin məzunlarından 16 nəfər olmaqla cəmi 335 nəfərin tələbə
adını qazandığını vurğulayıb. Məzunlardan 113 nəfərin
orta ixtisas təhsil müəssisələrinə daxil olduğunu diqqətə
çatdırıb. Ali təhsil müəssisələrinə daxil olan gənclərdən 15 nəfərin 600 baldan, 33 nəfərin
isə 500 baldan yüksək nəticə göstərdiyini bildirib. Həmçinin ali
məktəbə qəbul olan abituriyentlərdən 110 nəfərin Bakı
Dövlət Universitetinin tələbəsi adını aldığını qeyd edib.
Azərbaycan Yazıçılar Birliyi
Qazax zona filialının sədri, Əməkdar incəsənət xadimi, şair Barat Vüsal, "Azərbaycan Respublikası Qarabağ
Müharibəsi Əlilləri, Veteranları və Şəhid Ailələri” İctimai Birliyinin sədr
müavini Xasay Balayev, birliyin üzvü Nüsrət Musayev çıxış edərək vətənpərvərlik ruhunda olan belə
əhəmiyyətli tədbirin keçirilməsinə, bu cür ənənənin yaşadılmasına və rayonun şəhidlərinə
verdiyi yüksək dəyərə görə Rayon İcra Hakimiyyətinin başçısı Rəcəb Babaşova
bütün rayon sakinləri adından öz dərin minnətdarlıqlarını bildiriblər. Şəhidlər
xiyabanının belə yüksək səviyyədə yenidən qurulmasına və bu gün rayon ictimaiyyətinin
ixtiyarına verilməsinə görə sonsuz təşəkkürlərini çatdırıblar. Qeyd ediblər ki,
bu gün bir şəhid ruhunu şad etməklə, minlərlə şəhid ruhlarını şad etmiş oluruq.
Bu müqəddəs məkanda qazaxlı şəhidlərin timsalında bütün şəhidlərimizə olan
ehtiramımızı nümayiş etdiririk. Çıxış edənlər Bilik Günü ərəfəsində bu cür tədbirin
keçirilməsinin körpə balaların vətənpərvər ruhda tərbiyə olunmasında, Vətən,
xalq, dövlət naminə əsl vətəndaş kimi formalaşmasında böyük rol oynadığını qeyd
ediblər. Hər kəsə nümunə olacaq belə tədbirlərin davamlı olmasını, bu ənənənin
daim yaşadılmasını arzulayıblar.
Şəhid
anası Tamella Süleymanova, şəhidin həyat yoldaşı Kifayət Mustafayeva çıxış edərək
şəhid ailələrinə göstərdiyi diqqət və qayğıya görə Respublika Prezidenti İlham
Əliyevə, rayon rəhbərinə şəhid ailələri adından minnətdarlıqlarını çatdırıblar.
Qeyd edib ki, bugünkü tədbir bir daha onu sübut edir ki, torpaqlarımız uğrunda
canından keçən Vətən oğulları, şəhidlərimiz unudulmur, onların əziz xatirəsi
mütəmadi olaraq yad edilir və onlar bütün Azərbaycan xalqının qəlbində yaşayır.
Bu tədbir onu göstərir ki, dövlətimiz və dövlət başçımız, rayon rəhbərliyi tərəfindən
şəhidlərimizə olan hörmət bundan sonra da yüksək səviyyədə olacaqdır. Yeni
dərs ili ərəfəsində məktəblilərin şəhidləri yad etməsi, 2 il öncə əsası qoyulan
ənənənin bu il də davam etdirilməsi məktəblilər, onların valideynləri, şəhid
ailələri, müəllimlərlə yanaşı, ictimaiyyətin müxtəlif təbəqələrinin nümayəndələri
tərəfindən də yüksək qiymətləndirilib. Sonda məktəblilər
Vətənə, şəhidlərə həsr olunan şeirlər söyləyiblər. Məlumat
üçün qeyd edək ki, Qazaxda 31 məktəb şəhid adını daşıyır. GOYEZEN.AZ
Facebook-da paylaş