İcra başçısı İsmayıl Şıxlı adına Kosalar kənd tam orta məktəbində görülən işlərlə maraqlanıb
Xəbər verdiyimiz kimi, "Azərbaycan
Respublikası regionlarının 2019–2023-cü illərdə sosial-iqtisadi inkişafı Dövlət
Proqramı”nın həyata keçirilməsi üzrə hazırlanmış tədbirlər planında
Qazax rayonu üzrə 11 məktəb binasının əsaslı təmiri nəzərdə tutulub ki, həmin
məktəblərdən biri də məhz Xalq yazıçısı İsmayıl Şıxlının adını daşıyan
1176 şagird yerlik Kosalar kənd tam orta məktəbidir. Məktəbin istismara
yararsız olması nəzərə alınaraq Heydər Əliyev Fondu tərəfindən artıq bir aya
yaxındır ki, əsaslı şəkildə yenidən qurulmasına başlanılıb. Bu gün Qazax Rayon İcra Hakimiyyətinin başçısı Rəcəb
Babaşov məktəbdə görülən işlərlə maraqlanıb. İş icraçısı İlqar Səfərov görülən işlər barədə məlumat
verərək istər əsas binada, istərsə də təmir müddətində şagirdlərin dərsi üçün
nəzərdə tutulan, məktəbin yaxınlığında yerləşən yardımçı binada bütün işlərin
paralel şəkildə həyata keçirildiyini qeyd edib. Birinci mərtəbəsində 8, ikinci
mərtəbəsində isə 9 otaq yerləşən ikimərtəbəli yardımçı binanın dam örtüyünün
vurulduğunu, daxili fasadda suvaq işlərinin başa çatdığını, xarici fasadda isə
yekunlaşmaq üzrə olduğunu bildirib. Bundan əlavə, binada santexnik və elektrik
işlərinin də başa çatdığını vurğulayıb. İş icraçısı əsas məktəb binasında görülən işlər barədə
də məlumat verərək qeyd edib ki, hazırda dam örtüyünün vurulması üçün kəmər
tökülür, çatqı qurulur. Üçmərtəbəli binanın 2-ci və 3-cü mərtəbələrində söküntü
işləri tam başa çatıb. Birinci mərtəbədə isə bu iş yekunlaşmaq üzrədir. Söküntü
ilə yanaşı, qeyd olunan ikinci və üçüncü mərtəbələrdə suvaq işləri də
yekunlaşıb. Hazırda birinci mərtəbədə suvaq vurulmasına başlanılıb. Bundan
əlavə, məktəbin kənarına hasar çəkilməsi üçün özül hissənin qazılması ilə
yanaşı, hörgü işləri də davam etdirilir. Görülən işlərlə yaxından tanış olan rayon rəhbəri bəzi
tapşırıq və tövsiyələrini verib. Kənd sakini Tariyel Nəsibov ölkə başçısı İlham Əliyevə
və Heydər Əliyev Fondunun prezidenti, Birinci vitse-prezident Mehriban
Əliyevaya məktəbin əsaslı təmirinə görə bir daha kənd camaatının adından
minnətdarlığını bildirib. Xalq yazıçısı İsmayıl Şıxlının 100 illik yubileyi
ərəfəsində onun adını daşıyan Kosalar məktəbinin təmir olunması xəbərinin kənd
sakinləri tərəfindən böyük sevinc hissi ilə qarşılandığını söyləyib. Məlumat üçün onu da qeyd edək ki, məktəbdə ilkin
variantda nəzərdə tutulan təmir işləri başa çatdıqdan sonra Xalq yazıçısı
İsmayıl Şıxlının 100 illik yubileyi ilə əlaqədar büstü qoyulacaq.
GOYEZEN.AZ
Facebook-da paylaş