Qazaxda “Son zəng”ə hazırlıq işləri müzakirə olunub
İyunun 14-də respublikamızın bütün məktəblərində
"Son zəng" tədbirləri keçiriləcək. Hər yerdə olduğu kimi, Qazax
rayonunda da "Son zəng" tədbirlərinin yüksək səviyyədə təşkil
olunması üçün lazımi hazırlıq işləri görülür. Bu gün Qazax Rayon İcra Hakimiyyətinin akt zalında
bu məsələ ilə bağlı iclas keçirilib. İclasda rayonda fəaliyyət göstərən ümumtəhsil
məktəblərinin direktorları, direktor müavinləri, rayon Polis şöbəsinin əməkdaşları,
sahə rəisləri iştirak ediblər. Rayon
İcra Hakimiyyətinin başçısı Rəcəb Babaşov çıxış edərək qeyd edib ki, müasir dünyada hər bir ölkənin gələcəyi həmin
ölkədə təhsilin səviyyəsi ilə ölçülür. Təhsilin inkişafı hər bir ölkədə inkişaf
konsepsiyasının mühüm tərkib hissəsidir. Azərbaycan da bu ölkələr sırasındadır.
Ölkəmizdə son illərdə təhsilin inkişafı ilə bağlı həyata keçirilən tədbirlər
deməyə əsas verir ki, Azərbaycan öz gələcəyini daha etibarlı və inamlı görmək
istəyir. Respublika
Prezidenti İlham Əliyevin təhsil sahəsinə göstərdiyi diqqət və qayğıdan danışan
rayon rəhbəri təhsil sahəsinin Azərbaycan üçün ən prioritet
məsələlərdən biri olduğunu qeyd edib. İcra
başçısı bildirib ki, bugünkü iclasın əsas məqsədi respublikamızın bütün
bölgələrində təşkil olunan "Son zəng” tədbirlərini yüksək səviyyədə həyata
keçirmək üçün görüləcək işləri müzakirə etməkdir. Sonra
rayon rəhbəri "Son zəng" tədbirlərinin yüksək
səviyyədə qeyd edilməsi, həmin tədbirlərin məktəb daxilində keçirilməsi və iki
saat davam etməsi, bu tədbirlərin
keçirilməsində təhlükəsizliyin təmin edilməsi və digər məsələlərlə bağlı məktəb
direktorlarına, məktəblərə təhkim olunmuş məsul şəxslərə, eləcə də kənd və
şəhər üzrə sahə rəislərinə tapşırıq və tövsiyələrini verib.
Rayon Təhsil şöbəsinin müdiri Nizaməddin Babanlı
çıxış edərək təhsil sahəsinə göstərdiyi diqqət və qayğıya, səmimi münasibətə
görə təhsil sahəsində çalışan bütün müəllimlər adından öz dərin minnətdarlığını
bildirib. Hər il olduğu kimi, bu il də "Son zəng” tədbirlərinin yüksək səviyyədə
təşkil olunduğunu vurğulayıb.
Rayon Polis şöbəsinin rəisi Ədalət Əliyev çıxış
edərək bütün polis əməkdaşlarının, sahə rəislərinin "Son zəng” günü gücləndirilmiş
iş rejimində çalışacaqlarını bildirib. Ə.Əliyev valideynlərlə, məktəbi bitirən
məzunlarla maarifləndirici söhbətlər aparmağı, həmin gün hər hansı bir
xoşagəlməz hadisənin baş verməməsi üçün məktəb direktorlarına sahə rəisləri ilə
əməkdaşlıq etməyi tövsiyə edib. Məlumat
üçün qeyd edək ki, 2018/2019-cu
tədris ilində Qazax rayonunda fəaliyyət göstərən
40 ümumtəhsil məktəbindən 702 nəfər XI sinfi bitirərək məzun olacaq. Bu il IX
sinfi bitirən şagirdlərin sayı isə 980 nəfərdir. Eyni zamanda, builki
onbirincilərdən 456 nəfər ali məktəblərə qəbul olmaq üçün sənədlərini təqdim
edib.
GOYEZEN.AZ
Facebook-da paylaş