Qazaxda səhiyyə sahəsi daim diqqət mərkəzində saxlanılır
Qazax Rayon İcra Hakimiyyətinin başçısı Rəcəb Babaşovun rəhbər kimi təyin
olunduğu ilk gündən xüsusi diqqət göstərdiyi, mütəmadi olaraq qayğı ilə
yanaşdığı sahələrdən biri də səhiyyə sahəsidir. Rayon rəhbərinin bu sahəyə olan
diqqətinin ən bariz nümunəsi səhiyyə ocaqlarında olması, vətəndaşlara göstərilən
xidmətlərlə maraqlanmasıdır. Rayon İcra Hakimiyyətinin başçısı Rəcəb Babaşov bu
gün şəhərdə yerləşən Doğum Evinə baş çəkib. Mövcud vəziyyətlə maraqlanıb, vətəndaşlara
göstərilən xidmət sahələri, dərman təchizatı və yaradılan nizam-intizamla tanış
olub.
Tibb müəssisəsindəki şəraitlə maraqlanan rayon rəhbərinə məlumat
verilib ki, ana olacaq qadınlar ilk gündən qeydiyyata alınır və onlara hər cür
tibbi qulluq göstərilir.
Tibb işçiləri ilə səmimi şəkildə görüşən rayon rəhbəri dövlətimiz və
dövlət başçısı tərəfindən bütün bölgələrimizdə səhiyyə sahəsinə xüsusi diqqət və
qayğı göstərildiyini qeyd edib. Bildirib ki, bu gün rayonda əksər səhiyyə müəssisələrində
lazımi şəraitin olmamasına baxmayaraq bu sahədə çalışan tibb işçiləri mümkün
olan bütün imkanlardan istifadə edirlər ki, vətəndaşlar səhiyyə ocaqlarından
razı şəkildə ayrılsınlar.
Ölkə başçısının səhiyyə sahəsindəki həyata keçirdiyi məqsədyönlü işlərdən
söz açan rayon rəhbəri Qazaxda inşa olunan 10 korpusdan ibarət 145 çarpayılıq mərkəzi
xəstəxana binasının tikintisinin bunun əyani sübutu olduğunu qeyd edib. Ən
müasir avadanlıqlarla təchiz olunmuş yeni xəstəxananın yaxın vaxtlarda vətəndaşların
istifadəsinə veriləcəyini qeyd edib.
Sonra icra başçısı tibbi müayinə olunmaq üçün müraciət etmiş sakinlərlə
görüşüb, onlara göstərilən xidmətlərin keyfiyyəti, göstərilən diqqət və qayğı
ilə maraqlanıb. Sakinlər onlarla mütəmadi olaraq bu cür səmimi görüşlər keçirdiyinə,
səhiyyə sahəsinə xüsusi diqqət və qayğı göstərdiyinə görə rayon rəhbərinə dərin
minnətdarlıqlarını bildiriblər. Növbəli şəkildə tibbi müayinədən keçdiklərini
söyləyiblər.
Rayon rəhbəri vətəndaşlara qarşı münasibətdə bundan
sonra da daha diqqətli olmaları və hər zaman qayğı ilə yanaşmalarını bildirib,
bununla bağlı aidiyyəti üzrə tapşırıq və tövsiyələrini verib. GOYEZEN.AZ
Facebook-da paylaş