İcra başçısı 3 nömrəli məktəbdə olub
Son
illər Prezident İlham Əliyevin ölkəmizdə elm və təhsilin inkişafına xidmət edən
fərman və sərəncamlarına əsasən həyata keçirilən islahatlar Azərbaycan
təhsilinin dünya standartlarına uyğun qurulmasına zəmin yaradıb. Bunu
respublikamızın bütün bölgələrində yeni məktəb binalarının tikintisindən,
əsaslı və ya cari təmir olunmasından, məktəblərin maddi-texniki bazasının
gücləndirilməsindən də aydın şəkildə görmək olar. Son 3 ildə Qazaxda təhsil
sahəsinə olan diqqət və qayğı, müəllim və şagirdlərə olan səmimi münasibət, ən
əsası da bu sahədə qazanılan uğur və nailiyyətlər hər kəsə yaxşı məlumdur. Ölkə
başçısının, eləcə də rayon rəhbərliyinin təhsil sahəsinə olan qayğısının
nəticəsidir ki, bu gün Qazaxda təhsil sahəsi özünün intibah dövrünü yaşayır.
Ötən il Qazaxın qəbul imtahanlarının nəticələrinə görə respublika məktəbləri
arasında 3-cü yerdə dayanması o deməkdir ki, təhsil sahəsinə olan diqqət və
qayğı öz bəhrəsini verir. Rayon rəhbərinin fəaliyyətə başladığı ilk gündən
təhsil sahəsinə xüsusi həssaslıqla yanaşması, müəllim və şagirdərlə mütəmadi
olaraq görüşməsi rayonda təhsilin inkişafına böyük önəm verilməsindən xəbər
verir. İcra başçısının məktəblərdə şagirdlərlə görüşməsi demək olar ki, artıq
bir ənənə halını alıb.
Bu gün Qazax Rayon İcra Hakimiyyətinin başçısı
Rəcəb Babaşov İsmət Qayıbov adına şəhər 3 nömrəli tam orta məktəbdə olub,
məktəbin mövcud vəziyyəti, şagirdlərə verilən təhsilin keyfiyyəti, şagirdlərin
dərsə davamiyyəti, ən əsası da göstərilən diqqət və qayğı ilə maraqlanıb.
Məktəbin
direktor əvəzi Nailə Əfəndiyeva Respublika Prezidenti İlham Əliyevin təhsil
sahəsindəki həyata keçirdiyi genişmiqyaslı layihələrdən, görülən işlərdən söz
açıb. Qazaxda aparılan genişmiqyaslı tikinti-quruculuq işlərinə, təhsil
sahəsinə, müəllimlərə göstərdiyi diqqət və qayğıya görə ölkə başçısı İlham
Əliyevə rəhbərlik etdiyi kollektiv adından öz dərin minnətdarlığını çatdırıb.
Fəaliyyətə başladığı ilk gündən rayon təhsilinin inkişaf etdirilməsi üçün hər
zaman öz qayğısını əsirgəməyən rayon rəhbərliyinə sonsuz təşəkkürlərini ifadə
edib.
Rayon
rəhbərinə məktəbin müəllim-şagird kollektivi barədə məlumat verilərək qeyd edilib
ki, məktəbdə tədris Azərbaycan və rus bölmələri üzrə aparılır. Hazırda məktəbdə
419 nəfər şagird təhsil alır ki, onların da təlim-tərbiyəsi ilə 38 müəllim
məşğul olur. Bundan əlavə, 5 nəfər rəhbər heyət və 19 texniki işçi çalışır. Məktəbdə
2 birinci, 2 doqquzuncu və 2 onbirinci sinif var. Rus bölməsində təhsil alan birincilərin
sayı 31, Azərbaycan bölməsində təhsil alan birincilərin sayı isə 17 nəfərdir.
Bu il məktəbi bitirəcək onbirincilərin sayı 32 nəfərdir ki, onlardan 23 nəfəri
rus, 9 nəfəri isə Azərbaycan bölməsində təhsil alır.
Sonra sinif
otaqları, idman zalı və məktəbin həyəti ilə tanış olan icra başçısı məktəbdə
mövcud olan qayğılarla da maraqlanıb. Məktəb kollektivinin idman zalının
tavanının yenidən vurulması, qazanxananın dam örtüyünün təmiri, həyətdə oyun
meydançasının salınması, eləcə də məktəbin qarşısına tramplin
qoyulması ilə bağlı istəklərini dinləyən rayon rəhbəri
qaldırılan hər bir məsələyə baxılacağını bildirib və aidiyyəti üzrə tapşırıq
verib.
Məktəbin direktor əvəzi
N.Əfəndiyeva göstərdiyi qayğıya və səmimi münasibətə görə rayon rəhbərliyinə müəllim-şagird
kollektivi adından bir daha minnətdarlığını bildirib.
Facebook-da paylaş