İcra başçısı şəhid ailələri ilə görüşüb
Son illər Azərbaycan dövlətinin
müstəqilliyinin, suverenliyinin və ərazi bütövlüyünün təmin edilməsi və qorunub
saxlanması üçün ölkənin hərbi qüdrətinin artırılması, hərbi-sənaye kompleksinin
inkişaf etdirilməsi, silahlı qüvvələrin döyüş qabiliyyətinin gücləndirilməsi və
mənəvi-psixoloji vəziyyətinin daha da yüksəldilməsi dövlətin ən ümdə
vəzifələridir.
Bu gün Azərbaycanda ölkənin müdafiə
potensialının gücləndirilməsi, ölkəmizdə hərbi sahəyə ayrılan xərclərin əhəmiyyətli
dərəcədə artırılması ilə yanaşı, silahlı qüvvələrdə xidmət edən hərbi
qulluqçuların etibarlı sosial müdafiəsinin təmin edilməsi, mənzil-məişət
problemlərinin həll olunması, onlara verilən imtiyaz və güzəştlərin miqyasının
genişləndirilməsi də daim diqqət mərkəzində saxlanılır.
Bu gün dövlət siyasətinin mühüm
istiqamətlərindən biri də hərbi qulluqçulara dövlət icbari sığortasının
tətbiqidir. 1997-ci il avqustun 2-də "Hərbi qulluqçuların dövlət icbari şəxsi
sığortası haqqında” Azərbaycan Respublikasının Qanunu qüvvəyə mindikdən sonra
hərbi qulluqçuların həlak olması, itkin düşməsi və ya xəsarət alması zamanı
sığorta ödənişlərinin verilməsinə dair normativ hüquqi baza formalaşdırılmış,
belə ödənişlərlə bağlı maliyyə təminatı məsələsi həll edilmiş və Qanuna uyğun
olaraq sığorta ödənişlərinin verilməsinə başlanılmışdır.
Azərbaycan Respublikasının ərazi bütövlüyü uğrunda həlak olmuş, ölmüş və
hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş
hərbi qulluqçuların ailə üzvlərinin sosial müdafiəsinin yaxşılaşdırılması ilə
bağlı əlavə tədbirlər haqqında Respublika Prezidenti İlham Əliyevin 19 aprel
2018-ci il tarixli Fərmanı şəhidlərimizə və onların ailə üzvlərinə dövlət tərəfindən
göstərilən diqqət və qayğının bariz nümunəsidir.
1997-ci il avqustun 2-dək Azərbaycan
Respublikasının ərazi bütövlüyü uğrunda həlak olmuş, ölmüş və hərbi
əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi
qulluqçuların vərəsələrinə bu Fərmanla müəyyənləşdirilmiş qaydada 11.000 (on
bir min) manat məbləğində birdəfəlik ödəmənin verilməsi də şəhid ailələrinin
sosial müdafiəsinin yaxşılaşdırılmasına xidmət edir.
Qazax rayonu da Vətən,
torpaq, xalq uğrunda 285 şəhid verib. 7 nəfər igid oğlu Azərbaycanın Milli Qəhrəmanı
adına layiq görülüb. Rayonda Vətənin müstəqilliyi və ərazi bütövlüyü
uğrunda canından keçən şəhidlərimizə, onların ailə üzvlərinə olan qayğı həmişə
yüksək səviyyədə olub. Rayon rəhbərinin fəaliyyətə başladığı ilk gündən
şəhidlərimizin ailə üzvlərinə daim qayğı ilə yanaşması, şəhidlərimizin uyuduğu
qəbiristanlıqların, onların xatirəsinə ucaldılmış abidələrin, parkların,
bulaqların, xiyabanların abadlaşdırılması, yenilənməsi, əsaslı şəkildə təmir
edilməsi bunun əyani sübutudur. Şəhərin mərkəzində yerləşən Şəhidlər xiyabanı,
orada aparılan abadlıq işləri, ən əsası da 285 şəhidin adı və şəkli əks olunmuş
lövhənin vurulması bu istiqamətdə görülən işlərin əyani göstəricisidir.
Bu gün
rayonumuza ayrı-ayrı dövlətlərdən gələn qonaqların qürur yerimiz olan bu
müqəddəs məkana baş çəkməsi, memorial önünə tər çiçəklər düzməsi, əziz
xatirələrini ehtiramla yad etmələri şəhidlərə olan ehtiramın daha bir
nümunəsidir. Bundan əlavə, rayonda keçirilən tədbirlərin öncə bu müqəddəs
məkanı ziyarətlə başlaması, məktəblilərin mütəmadi olaraq xiyabanı ziyarət
etmələri, şəhidlərimizin doğum və anım günlərinin qeyd olunması onların daim
qəlblərdə yaşaması deməkdir.
Hər kəsə yaxşı
məlumdur ki, rayon rəhbəri fəaliyyətə
başladığı ilk gündən mütəmadi olaraq şəhid ailələri ilə görüşlər keçirir. Lazım
gəldikdə isə fərdi şəkildə qəbul edir, qayğıları ilə maraqlanır.
İcra başçısı bu gün Qazax Rayon İcra Hakimiyyəti Aparatına müraciət
etmiş şəhid ailələri üzvlərinin sığorta ödənişi ilə bağlı müraciətlərinin
araşdırılması ilə əlaqədar bir qrup şəhid ailəsi ilə görüşüb.
İcra başçısı bildirib ki, yadınızdadırsa bu məsələ ilə bağlı mən sizlərlə
ötən il iki dəfə - 10 və 19 oktyabr 2018-ci il tarixlərdə görüşdüm. Birdəfəlik
ödəmə ilə bağlı müraciətlərinizi dinləyən zaman sizlərə
bildirdim ki, qaldırılan hər bir məsələyə diqqətlə yanaşılacaq və həlli mümkün
olan nə varsa ediləcəkdir. Sizlərin mövqeyiniz, bu məsələyə xüsusi həssalıqla yanaşmağınız
həm şəhidlərimizin, həm də rayonumuzun adını uca etdi. Mən də sizlərin
dövlətinə, dövlət başçısına olan inam və etimadını doğrultmaq üçün dəfələrlə bu
mövzu ətrafında danışıqlar apardım. Sizlərin istəyini aidiyyəti təşkilatlar
qarşısında səsləndirdim. Bəli, bu gün sizlərin haqlı olaraq qaldırdığınız həmin
məsələ dövlət başçısı tərəfindən öz müsbət həllini tapdı.
"Azərbaycan Respublikasının ərazi bütövlüyü uğrunda həlak olmuş,
ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan
edilmiş hərbi qulluqçuların ailə üzvlərinin sosial müdafiəsinin
yaxşılaşdırılması ilə bağlı əlavə tədbirlər haqqında” Azərbaycan Respublikası
Prezidentinin 2018-ci il 19 aprel tarixli 1 nömrəli Fərmanında dəyişiklik edilməsi
barədə Azərbaycan Respublikası Prezidentinin 28 yanvar 2019-cu il tarixli Fərmanı
ölkə başçısının humanistliyini nümayiş etdirməklə yanaşı, siz şəhid ailələrinə
necə yüksək dəyər verdiyini bir daha göstərdi.
Şəhid ailələri ilə keçirilən görüşdə dövlət başçısının şəhidlərimizin,
onların ailə üzvlərinin ünvanına söylədiyi dəyərli fikirlər bir daha onu sübut
etdi ki, Vətənin azadlığı uğrunda canından keçmiş bütün oğul və qızlarımızın
xatirəsi hər zaman əziz tutulacaqdır. Onların ailələrinə, yaxınlarına,
doğmalarına həmişə diqqət və qayğı olub və bu, bundan sonra da belə olacaqdır.
Rayon rəhbəri Azərbaycan Respublikasının ərazi bütövlüyünün,
müstəqilliyinin və konstitusiya quruluşunun müdafiəsi ilə əlaqədar əlil olmuş
şəxslərin və şəhid ailələrinin sosial-məişət şəraitinin yaxşılaşdırılmasına
dair əlavə tədbirlər haqqında Azərbaycan Respublikası Prezidentinin 28
yanvar 2019-cu il tarixli Sərəncamını, şəhid
ailəsi üçün Azərbaycan Respublikası Prezidentinin təqaüdünün artırılması
haqqında Azərbaycan Respublikası Prezidentinin 30
yanvar 2019-cu il tarixli Fərmanını Azərbaycanda şəhidlərimizə, onların ailə
üzvlərinə olan yüksək diqqət və qayğının, verilən dəyərin əyani təzahürü
olduğunu bildirib.
Quşçu Ayrım kənd sakinləri olan şəhid atalarından Aslan Pirvəliyev, Abbas
Mirzəyev, Qaymaqlı kənd sakini olan şəhid anası Lilpar Bəşirova, şəhər sakini
olan şəhid ailəsi Kifayət Mustafayeva çıxış edərək bildiriblər ki, fəaliyyətə
başladığınız ilk gündən biz şəhid ailələrinə hər zaman xüsusi qayğı ilə
yanaşmısınız. Biz şəhid ailələri ilə keçirilən hər bir görüş bizdə dövlətimizə,
dövlət başçımıza hər zaman inam hissi yaradıb. Son iki il yarımdır ki, rayonda
vətəndaş amilinin ön plana çəkilməsinin nəticəsidir ki, hər bir məsələ öz
müsbət həllini tapır. Biz sizinlə görüşən zaman da qaldırdığımız məsələnin həll
olunacağına tam əmin idik. Çünki bilirdik ki, ölkə başçımız həmişə olduğu kimi
yenə də öz humanistliyini bir daha göstərəcək və şəhidlərimizin ailə üzvlərinə
veriləcək həmin birdəfəlik müavinət hər kəsə şamil olunacaq. Bəli, bu gün biz
bunun bir daha şahidi olduq. Buna görə də biz şəhid ailələri bizlərə verilən bu
yüksək dəyərə, ən əsası da şəhidlərimizə olan sonsuz hörmət və ehtirama görə
Respublika Prezidenti İlham Əliyevə bütün şəhid ailələri adından dərin
minnətdarlığımızı bildiririk. Biz şəhid ailələrinə həmişə səmimi münasibət
göstərdiyinizə görə sizə təşəkkür edirik.
Qazax
Rayon İcra Hakimiyyətinin başçısı Rəcəb Babaşov görüşə yekun vuraraq bildirib
ki, fəaliyyətə başladığım ilk gündən şəhid ailələrinə, Qarabağ müharibəsi əlillərinə
və veteranlarına, məcburi köçkün ailələrinə xüsusi diqqət və qayğı göstərməyə
çalışmışam. Çünki sizlər hər şeyin ən yaxşısına layiqsiniz. Vətən uğrunda
canını fəda edən insanların doğmalarına qayğı ilə yanaşmaq isə hər kəsin ən ümdə
vəzifəsidir.
Çıxışının
sonunda "Şəhidlərimizin qanı yerdə qalmayacaqdır”, - deyən rayon rəhbəri Ali
Baş Komandan, Prezident İlham Əliyevin uzaqgörən siyasəti nəticəsində qələbə xəbərinin
elə də uzaqda olmadığını qeyd edib.
GOYEZEN.AZ
Facebook-da paylaş