2 Fevral - Gənclər Günü Qazaxda böyük təntənə ilə qeyd olunub
2
Fevral - Gənclər Günü respublikamızın hər yerində olduğu kimi, Qazax rayonunda
da böyük təntənə ilə qeyd olunub. Bu münasibətlə Gənclər Mərkəzində təşkil
olunan tədbirdə Qazax Rayon İcra Hakimiyyətinin başçısı Rəcəb Babaşov, aparatın
məsul işçiləri, hüquq-mühafizə orqanlarının, idarə, müəssisə, təşkilatların
rəhbərləri, təhsil, səhiyyə, mədəniyyət işçiləri, RİHB-nin kənd İnzibati Ərazi
Dairələri üzrə nümayəndələri, Qarabağ Müharibəsi Əlilləri, Veteranları və Şəhid Ailələri İctimai Birliyinin üzvləri, N saylı hərbi hissənin əsgərləri, rayonda
çalışan, təhsil alan fəal gənclər və tələbələr, KİV nümayəndələri iştirak
ediblər. Tədbir iştirakçıları əvvəlcə ulu
öndər Heydər Əliyevin abidəsini ziyarət edərək heykəli önünə gül dəstələri
qoyub, əziz xatirəsini böyük ehtiramla yad ediblər. Qazax şəhər 1
saylı Uşaq Musiqi Məktəbinin xor kollektivinin ifasında Azərbaycan
Respublikasının Dövlət Himni səsləndikdən sonra bayram tədbirinə start verilib. Tədbirin
aparıcısı, Qazax
Dövlət Dram Teatrının aktrisası Zəmanə
Dərviş Gənclər Gününə həsr olunmuş tədbiri açıq elan edərək bütün tədbir
iştirakçılarını, gəncləri əlamətdar gün münasibətilə təbrik edib.
Tədbirdə çıxış edən Qazax Rayon İcra Hakimiyyətinin
başçısı Rəcəb Babaşov gəncləri salamlayaraq 2 Fevral - Gənclər Günü münasibətilə bütün
Azərbaycan gənclərini, o cümlədən də qazaxlı gəncləri səmimi qəlbdən təbrik
edib, xoş arzularını çatdırıb. İcra başçısı qeyd edib ki, dahi lider Heydər Əliyev
Azərbaycan gəncliyini hər mənada güclü görmək istəyirdi. Odur ki, ümummilli
lider 1994-cü illin iyulunda Azərbaycanda Gənclər və İdman Nazirliyini yaratdı
və xalqının gənclərini bir araya topladı. 1996-cı il fevralın 2-də isə ilk dəfə
müstəqil dövlətimizin gənclər Forumu keçirildi. 1997-ci il fevral ayının 1-də isə Azərbaycan Respublikası Prezidentinin Forum nümayəndələrinin bir
qrupu ilə görüşündə Forumdan keçən 1 il ərzində görülmüş işlər təhlil olunaraq
gəncliklə bağlı əsas problemlərin həlli yolları müəyyən edildi. Ulu öndər
Heydər Əliyevin elə həmin gün imzaladığı Sərəncamla fevral ayının 2-si
Azərbaycanda Gəncləri Günü elan edildi. Gənclərə, gələcək nəslə çox böyük fikir verən, onların problemlərini
hər zaman diqqət mərkəzində saxlayan Prezident İlham Əliyev tərəfindən
gənclərin problemlərinin həlli üçün mühüm addımlar atılır. 2007-ci ilin
"Gənclər ili” elan edilməsi, "Azərbaycan Gəncliyi Dövlət Proqramı”nın təsdiqi, 2011-ci ildə Gənclər Fondunun yaradılması, gənclər, onların sosial müdafiəsi ilə
bağlı müxtəlif Sərəncamların verilməsi gənc nəslə göstərilən diqqət və qayğının
ən bariz nümunəsidir. Rayon rəhbəri bildirib ki, ulu öndər Heydər
Əliyevin "Gənclər bizim gələcəyimizdir” kəlamının bu gün də şahidi oluruq. Həmin
kəlam bu gün də özünü real həyatda doğruldur. Çünki ümummilli liderin layiqli
davamçısı, ölkə prezidenti İlham Əliyevin apardığı məqsədyönlü siyasətin təməlində,
əsasında gənclər və onlarla bağlı verilən qərarlar, atılan uğurlu addımlar
dayanır. Son illər dövlət başçısı tərəfindən imzalanan Sərəncamlara nəzər
salsaq aydın şəkildə görmək olar ki, Azərbaycanda bütün işlər gələcəyimiz olan
gənclərin inkişafına, maddi rifah halının yaxşılaşdırılmasına, bir sözlə,
gənclərimizin parlaq gələcəyinin təminatına hesablanıb. Rayon rəhbəri vurğulayıb ki, bu gün dövlətimizin və
dövlət başçısının gənclərlə bağlı apardığı siyasət bütün bölgələrimizi əhatə
edir. Bu gün respublikamızın elə bir bölgəsi tapılmaz ki, həmin bölgədən olan
gənclərin səsi yüksək kürsülərdən gəlməsin. Bu gün sevindirici hallardan biri
də odur ki, Azərbaycan brendi olan və bütün dünyada tanınan "ASAN xidmət" mərkəzlərində gənclərə böyük üstünlük verilir. Gənclərin yüksək intellektə,
bilik və bacarığa sahib olması üçün minlərlə tələbənin xarici ölkələrdə təhsil
almaları üçün hər cür şərait yaradılır. "Bu gün siz gənclər ona görə fəxr etməlisiniz ki,
günü-gündən inkişaf edən, müstəqil bir dövlətin gənclərisiniz”, - deyən rayon
rəhbəri bu yolda hər bir gəncə öz ölkəsinə, dövlətinə sadiq gənclər kimi
yetişmələrini arzulayıb. Qeyd edib ki, Azərbaycanın sağlam əqidəyə, düşüncəyə
sahib olan bilikli, bacarıqlı gəncləri hər zaman olub və bu, bundan sonra da
belə olacaqdır. Çünki ötən ilin 11 aprel tarixində keçirilən Prezident
seçkiləri siz gənclərin hansı gücə və qüvvəyə malik olmasını, həqiqətən də Azərbaycanda
öz dövlətinə sadiq olan əsl gənclər ordusunun formalaşdığını bir daha nümayiş
etdirdi. Bu gün bizlər də siz gənclərimizlə fəxr edirik ki, sizlərə olan
etimad, inam, göstərilən diqqət və qayğı öz bəhrəsini verir.
Rayon Gənclər və İdman
İdarəsinin rəisi Vüqar Nəbiyev məruzə ilə çıxış edərək bütün gəncləri Gənclər
Günü münasibətilə təbrik edib, gələcək fəaliyyətlərində uğurlar arzulayıb. Qeyd
edib ki, bu gün fəxr hissi ilə deyə bilərik ki, Gənclər Günü MDB məkanında və
Şərqi Avropa ölkələri arasında ilk dəfə olaraq Azərbaycanda qeyd olundu.
Azərbaycanda Gənclər günü qeyd olunduqdan sonra digər MDB ölkələrində və Şərqi
Avropa dövlətlərində də bu gün qeyd olunmağa başladı. Dünyada yalnız 1999-cu
ildə BMT-nin qərarı ilə avqustun 12-si Gənclər Günü elan edildi. "Bütün bu
uğurlara, böyük təntənə ilə qeyd etdiyimiz 2 Fevral gününə görə ulu öndər
Heydər Əliyevə borcluyuq”, - deyən V.Nəbiyev ölkə başçısı İlham Əliyev
tərəfindən gənclərimizə göstərilən diqqət və qayğıdan da söz açıb. Qeyd edib ki, dövlətin gənclərə göstərdiyi diqqət və
qayğının bariz nümunəsidir ki, gənclər haqqında "Azərbaycan gəncliyi 2005-2009-cu illərdə”, "Azərbaycan gəncliyi 2011-2015-ci illərdə” və "Azərbaycan gəncliyi
2017-2021-ci illərdə” Dövlət Proqramları qəbul edilmiş, gənclərin sağlam fiziki
və əqli inkişafı yönündə, eləcə də, onların sosial-məişət problemlərinin həlli
istiqamətində bir sıra mühüm Sərəncamlar verilmişdir. 17 aprel 2006-cı
il tarixli Sərəncamla təsdiq edilmiş xüsusi istedada malik olan uşaqların
(gənclərin) yaradıcılıq potensialının inkişafı üzrə Dövlət Proqramı, 16 aprel
2007-ci il tarixli 2007-2015-ci illərdə Azərbaycan gənclərinin xarici ölkələrdə
təhsili üzrə Dövlət Proqramı, 2 iyul 2013-cü il tarixli 934 saylı Sərəncamla
Gənclər üçün Prezident mükafatlarının təsis edilməsi, Respublika Prezidenti İlham Əliyevin 26 yanvar
2015-ci il tarixli Sərəncamı ilə "2015-2025-ci illərdə Azərbaycan gənclərinin İnkişaf Strategiyası”nın
təsdiq edilməsi, respublikanın
20-dən artıq şəhər və rayonunda gənclər mərkəzlərinin inşası və s. bu kimi
Fərman və Sərəncamlar gənclər siyasətinin uğurlu inkişafının real təsdiqidir. V.Nəbiyev bildirib ki, Qazax
Rayon İcra Hakimiyyətinin başçısı Rəcəb Babaşov rayonumuzda fəaliyyətə
başladığı ilk gündən gənclərə böyük diqqət və qayğı ilə yanaşır, ictimai
həyatın bütün sahələrində gənclərə böyük etimad göstərir. Rayon Gənclər və İdman İdarəsinin 2018-ci il üçün təsdiqlənmiş
tədbirlər planının icrası təmin olunaraq 2018-ci il ərzində yeniyetmə və
gənclərin siyasi, mənəvi tərbiyəsinin təkmilləşdirilməsi, onların sosial,
intellektual, fiziki inkişafının təmin edilməsi, asudə vaxtlarının səmərəli
təşkili sahələrinə yönəldilmiş bir sıra tədbirlər həyata keçirilmişdir. Belə
ki, 2018-ci il ərzində rayonda gənclərlə iş sahəsi üzrə təsdiqlənmiş tədbirlər
planına əsasən 21, ümumilikdə isə 25 tədbir həyata keçirilmiş və keçirilən
tədbirlərdə gənclərin bütün təbəqələri təmsil olunmaqla 3989 nəfər gənc iştirak
etmişdir. 2018-ci il ərzində bədən tərbiyəsi və idman sahəsi üzrə 34 tədbir
həyata keçirilmişdir ki, ümumilikdə, bu yarışlarda 2826 nəfərdən çox idmançı öz
qüvvəsini sınamışdır. 2018-ci il ərzində rayon idmançıları respublika və
beynəlxalq miqyaslı yarışlarda uğurla çıxış etmişlər. Rayon idmançıları
tərəfindən beynəlxalq miqyaslı yarışlarda 49, respublika miqyaslı yarışlarda
isə 146 medal qazanılmışdır. Müqayisə üçün qeyd edək ki, idmançılarımız 2017-ci
il ərzində isə beynəlxalq miqyaslı yarışlarda 38, respublika miqyaslı
yarışlarda isə 115 medal qazanmışlar. Göstərilən diqqət və qayğıdan ruhlanan
gənclərimiz iştirak etdikləri yarışlarda, müsabiqə və televiktorinalarda, eləcə
də "Ölkəmizi tanıyaq” maarifləndirici tur-aksiya zamanı intellektual bilik
yarışlarında uğurla çıxış edərək yüksək nəticələr əldə etmişlər. Belə ki, 02.05.2018-ci il
tarixdə Göygöl şəhərində Kompyuter oyunları üzrə gənclər arasında XII
Azərbaycan Milli Çempionatının zona yarışlarında rayonumuzun "Empire” komandası
II yeri tutmuşdur. 19.05.2018-ci il tarixdə Şəmkir rayonunda keçirilən "Sərhəd”
Hərbi-İdman Oyununun zona mərhələsində Birinci Şıxlı kənd tam orta məktəbin
"Dəli kür” komandası I yeri tutaraq finala vəsiqə qazanmışdır. 02.10.2018-ci il tarixdə Gəncə
şəhərində Azərbaycan Gənclərinin VIII Forumunun zona toplantısı keçirilmiş, toplantıda
Qazax rayonundan 25 nəfər fəal gənc iştirak etmişdir. Toplantıda fəal gənc Akif
Əmirov çıxış edərək rayon gəncliyini layiqincə təmsil etmişdir. 14-16.10.2018-ci il tarixlərdə Cəfər Cabbarlı adına Azərbaycanfilm
kinostudiyasında keçirilən "Mən Azərbaycanlıyam” tele-layihəsində Nəbiyev Elmar
Anar oğlu iştirak edərək final mərhələsinin qalibi olmuşdur. 16.11.2018-ci
il tarixdə Bakı şəhərində Azərbaycan Gənclərinin VIII Forumu keçirilmişdir.
Forumda Qazaxı 11 nəfər fəal gənc təmsil etmişdir. Forum çərçivəsində keçirilən
Debatlarda rayonumuzun gənci Qarabağ qazisi Musəvi Kamil İbadət oğlu gəncləri
maraqlandıran sualları cavablandırmışdır. 29.11.2018-ci il tarixdə "İDEA” İctimai Birliyinin,
Ekologiya və Təbii Sərvətlər Nazirliyi və BMT-nin Ərzaq və Kənd Təsərrüfatı
Təşkilatının (FAO) təşkilatçılığı ilə Qazaxda aztəminatlı ailələr üçün ərik bağlarının salınması üçün rayonun
Qazaxbəyli kəndi ərazisində keçirilən mərasimdə Rayon İcra Hakimiyyətinin
başçısı Rəcəb Babaşovun ağacəkmə aksiyasında şəxsən iştirak etməsi
gənclərimizdə böyük ruh yüksəkliyi yaratmışdır. Həmin ağacəkmə aksiyasında
rayonun 200-dən çox fəal gənci iştirak etmişdir. 10-15.12.2018-ci il tarixlərdə Azərbaycan
Respublikasının Gənclər və İdman Nazirliyinin təşkilatçılığı ilə keçirilən
"İstedadların Hazırlığı Laboratoriyası” II Beynəlxalq Olimpiadasında Qazax
şəhər 5 nömrəli tam orta məktəbin şagirdi Abdullayev Tural Niyazi oğlu
riyaziyyat, fizika və kimya fənləri üzrə iştirak edərək Diplomla təltif edilmişdir. Sonra Qazax RİHB aparatında məsləhətçi Səba Paşayeva, gənc rəssam Akif Əmirov, şəhid kapitan Mühüd Orucov adına
Tədris Mərkəzinin direktoru Gülanə Hüseynova, Qazax Dövlət Sosial-İqtisadi Kollecinin Tələbə Gənclər Təşkilatının
sədri Elvira Əfəndiyeva, YAP Qazax rayon təşkilatı Gənclər Birliyinin sədri
Vüsal İsmayılovçıxış edərək Azərbaycan gənclərinin bugünkü uğurlarından danışıb, onlara
göstərdiyi diqqət və qayğıya görə ölkə başçısı İlham Əliyevə, Azərbaycanın
Birinci vitse-prezidenti Mehriban xanım Əliyevaya öz dərin minnətdarlıqlarını
bildiriblər. Rəhbər kimi təyin olunduğu ilk gündən gənclərə xüsusi qayğı ilə
yanaşdığına görə Qazax Rayon İcra Hakimiyyətinin başçısı Rəcəb Babaşova sonsuz
təşəkkürlərini çatdırıblar. Tədbirdə rayonun
ictimai-siyasi həyatında, təhsil, səhiyyə, mədəniyyət, idman, eləcə də digər
sahələrdə fərqlənən, gənclər siyasətinin
həyata keçirilməsində fəal iştirak edən gənclərə Qazax rayon Gənclər və İdman
İdarəsi tərəfindən Diplom və hədiyyələr, gül dəstələri təqdim olunub. Sonra 2 Fevral - Gənclər
Gününə həsr olunmuş tədbir bayram konserti ilə davam etdirilib. Gənc
müğənnilərdən Nəsimi Aşbazlının ifasında səslənən "Heydər xalq deyəcək”, Lalə
Əliyevanın ifasında səslənən "El mənimdir”, Niyazi Yusifovun ifasında səslənən "Azərbaycan
torpağında”, şəhər 1 saylı Uşaq Musiqi Məktəbinin xor kollektivinin ifasında
səslənən "Bu qala daşlı qala”, Rauf Namazovun ifasındasəslənən bir-birindən şən-şux bayram mahnıları
alqışlarla qarşılanıb. Mədəniyyət Mərkəzinin "Qonçə” rəqs qrupunun ifasında
nümayiş olunan "Naz eləmə rəqsi”, Uşaq-Gənclər İnkişaf Mərkəzinin dərnək üzvü
Sarif Vəliyevin ifasında səslənən "Azərbaycanım” mahnısı da tədbirə əsl bayram
əhval-ruhiyyəsi qatıb. 2 Fevral Gənclər Gününə həsr olunmuş bayram tədbiri Qazax Dövlət Dram
Teatrının aktrisası Zəmanə Dərvişin ifasında "Yaşa Azərbaycan” mahnısının
sədaları altında üçrəngli Azərbaycan bayrağının dalğalanması ilə başa çatıb. Qazax Rayon İcra Hakimiyyətinin başçısı Rəcəb
Babaşov tədbirə yekun vuraraq gənclər günü münasibətilə rayonun bütün
gənclərini bir daha səmimi qəlbdən təbrik edib və ən xoş arzularını bildirib.
Müstəqil Azərbaycanın parlaq gələcəyi naminə həyata keçirəcəkləri bütün işlərdə
nailiyyətlər qazanmalarını arzulayıb. GOYEZEN.AZ
Facebook-da paylaş