Qazaxda daha bir körpələr evi-uşaq bağçasının açılışı
Qazaxda körpələrə qayğı daim rayon rəhbərliyinin diqqət mərkəzindədir. Respublika Prezidenti cənab İlham Əliyevin regionlarda uşaq bağçalarının tikintisi ilə bağlı imzaladığı
12 fevral 2018-ci il tarixli Sərəncamı yola saldığımız ildə də Qazaxda uğurla
icra olunmuşdur. Dövlətimizin
uşaqlara olan sonsuz diqqətinin nəticəsidir ki, bu gün Qazaxda fəaliyyət
göstərən uşaq bağçalarının 70 faizindən çoxu ən müasir standartlar
səviyyəsindədir. Ötən il 6 saylı bağçanın da əsaslı şəkildə yenidən
qurulmasına başlanılıb, bu günlərdə isə əsaslı şəkildə yenidən qurulan həmin körpələr
evi-uşaq bağçası körpələrin istifadəsinə verilib. Rayon rəhbəri Rəcəb Babaşov açılış mərasimində çıxış
edərək yeni bağçanın istifadəyə verilməsi münasibətilə körpələri, valideynləri
və bağçanın kollektivini təbrik edib, xoş arzularını çatdırıb. İcra başçısı
bildirib ki, bu gün ölkəmizdə Respublika Prezidenti cənab İlham Əliyev, Birinci
vitse-prezident Mehriban xanım Əliyeva tərəfindən körpələrə hər cür diqqət və
qayğı göstərilir. Ölkə başçısının bu sahədə həyata keçirdiyi uğurlu siyasət
respublikamızın bütün bölgələrində, o cümlədən Qazaxda uğurla icra olunur. Rəcəb
Babaşov diqqətə çatdırıb ki, təkcə 2018-ci ildə istifadəyə verilən 5 bağça –
Quşçu Ayrım, Bala Cəfərli, Canalı, şəhər 2 və 3 saylı uşaq bağçaları tam müasir
tələblərə cavab verən bağçalar səviyyəsindədir. Yaradılan yüksək şərait və
təchizat böyük şəhərlərdə olan bağçalardan heç də geri qalmır. Tədbirdə çıxış edən qonaqlardan Qazax rayon Maliyyə
İdarəsinin rəisi Novruz Abdullayev, Uşaq Xəstəxanasının baş həkimi Üzeyir
Vəliyev, ötən il əsaslı şəkildə təmir olunan İkinci Şıxlı kənd 2 saylı kənd
körpələr evi-uşaq bağçasının müdiri Lalə Qurbanova və başqaları bu əlamətdar
hadisəni dövlətimizin xalqın gələcəyinə olan qayğısının göstəricisi kimi
səciyyələndirdilər. Yeni istifadəyə verilən şəhər 6 saylı körpələr
evi-uşaq bağçasının müdiri Lalə Məmmədli çıxış edərək onlar üçün yaradılan
yüksək şəraitə və sonsuz qayğıya görə rayon rəhbərliyinə kollektiv adından
minnətdarlığını çatdırıb. Bundan sonra daha da məsuliyyətlə çalışacaqlarını və
onlara göstərilən etimadı daim doğruldacaqlarını bildirib. Vəli VƏLİYEV, "Respublika” qəzeti 26 yanvar 2019-cu il
Facebook-da paylaş