Ağköynək kəndində sakinlərlə səyyar görüş keçirilib
Son iki il yarımdır ki, Qazaxda bütün sahələr üzrə
təqdirəlayiq işlər görülür. Ən əsası isə görülən bütün işlər, həyata keçirilən
məqsədyönlü tədbirlər vətəndaşların rahatlığının təmin olunmasına, qayğılarının
öz müsbət həllini tapmasına xidmət edir. Qazax Rayon İcra Hakimiyyətinin
başçısı Rəcəb Babaşovun istər şəhər mərkəzində, istərsə də kəndlərdə mütəmadi
olaraq səyyar görüşlər keçirməsi, sakinlərin müraciətlərini yerində dinləyərək
qaldırılan hər bir məsələyə diqqət və qayğı ilə yanaşması bu dediklərimizin
əyani sübutudur. Fəaliyyətə başladığı ilk gündən sakinlərlə keçirilən bu cür
görüşlər artıq bir ənənə şəklini alıb. İcra başçısı həmin ənənəni bu il də
davam etdirir. Kənd sakinləri rayon rəhbərini böyük səmiyyət və
hörmətlə qarşılayıblar.
Qazax Rayon İcra Hakimiyyətinin başçısı Rəcəb Babaşov
görüşdə çıxış edərək kənd sakinlərini salamlayıb, yeni
ildə ölkəmizin tərəqqisi naminə yeni-yeni uğurlar arzulayıb. Qeyd edib ki, artıq iki il yardımdır ki, ənənə halını
almış bu cür görüşlərin keçirilməsinin əsas məqsədi rayonumuzda, eləcə də
Ağköynək kəndində görülmüş işlərdən, kənd təsərrüfatında əldə edilən
uğurlardan, işsizliyin aradan qaldırılması üçün həyata keçirilən tədbirlərdən
danışmaqla yanaşı, sizi narahat edən məsələləri də öyrənməkdir. İcra başçısı
bildirib ki, qarşıya qoyulan məqsəd Prezident İlham Əliyevin tapşırıq və
tövsiyələrinin layiqincə yerinə yetirilməsi, vətəndaşlara bütün sahələrdə
diqqət və qayğı göstərilməsidir. Ölkə Prezidenti İlham Əliyevin rəhbərliyi altında respublikamızda, eləcə də
bölgələrimizdə həyata keçirilən genişmiqyaslı işlərdən söz açan rayon rəhbəri 2018-ci
ilin bu baxımdan daha əlamətdar olduğunu bildirib. İcra başçısı qeyd edib
ki, ölkəmizdə olan dinamik inkişafı 2019-cu il
yanvar ayının 11-də Respublika Prezidenti İlham Əliyevin sədrliyi ilə Nazirlər
Kabinetinin 2018-ci ilin sosial-iqtisadi inkişafının yekunlarına və qarşıda
duran vəzifələrə həsr olunmuş geniş iclasındakı çıxışından da aydın şəkildə
gördük. İclasda ölkə başçısı öz çıxışında ölkəmizin uğurla və hərtərəfli
inkişaf etdiyini, bütün sahələrdə dinamik inkişafın təmin olunduğunu bir daha
bütün dünyaya bəyan etdi. Bu gün Azərbaycan həyatın bütün sahələrində inkişaf
etmiş ölkə olduğunu qazandığı uğur və nailiyyətləri ilə nümayiş etdirdi. İcra başçısı son iki il yarımda Qazaxda
aparılan abadlıq və quruculuq işlərini müqayisə edərək bildirib ki, bu gün tam
əminliklə deyə bilərik ki, rayonumuz 2018-ci ildə bir çox uğurlara imza
atıb. Bunu rayonda inşa olunan sosial obyektlərin sayı, kənd
təsərrüfatının ildən-ilə inkişaf etməsi, əkin sahələrinin hektarının
artırılması, təhsil, səhiyyə, mədəniyyət, idman, eləcə də digər sahələrdə əldə
etdiyimiz nailiyyətlər söyləməyə əsas verir.
Rayon rəhbəri qeyd edib ki, bu gün Qazaxda ”Azərxalça”
ASC tərəfindən tikilən xalça müəssəsini, ”Mətanət A” şirkəti tərəfindən inşa
edilmiş Əhəng zavodunu, hazırda son tamamlanma işləri aparılan İkinci Şıxlı
kəndində ”İnvestel GROUP” MMC tərəfindən tikilən Aqroparkı, "Gedik
Carçı Qaynaq” LTD şirkəti tərəfindən inşa
edilən "Gedik-Carçı” Elektrod Zavodunu, 145 çarpayılıq rayon
mərkəzi xəstəxanasının tikintisini nümunə göstərərək deyə bilərik ki, 2018-ci
il Qazax rayonu üçün tikinti-quruculuq ili kimi də yadda qaldı. Rayon rəhbəri bildirib ki, bu gün düşmənlə 168 km
sərhəddi olan, 5 kəndi daim atəşə məruz qalan bir rayon üçün vacib məsələlərdən
biri də Qazaxda müasir tələblərə cavab verən xəstəxananın olması idi. Dövlət
başçısının diqqət və qayğısı sayəsində bu məsələnin öz müsbət həllini tapmasını
yüksək qiymətləndirən rayon rəhbəri artıq 5 korpusun inşa olunduğunu diqqətə
çatdırıb. Əlavə 3 korpusun inşasının da nəzərdə tutulduğunu bildirib. İcra başçısı rayonumuzda barama, tütün,
kartof və taxıl sahələrindən götürdüyümüz bol məhsuldarlıqdan danışaraq 2018-ci
ili kənd təsərrüfatı ili kimi dəyərləndirib. Bildirib ki, bu inkişafı əkin
sahələrinin hektarından da aydın şəkildə görmək olur. Belə ki, 2016-cı ildə
16520,6 hektarda, 2017-ci ildə 18694,37 hektarda əkin aparılmışdısa, 2018-ci
ildə bu rəqəm 20682 hektar olmuşdur. 2019-cu ildə isə 21481,30 hektarda əkin
işlərinin aparılması nəzərdə tutulmuşdur. Rayon rəhbəri Qazaxda kənd
təsərrüfatının inkişaf etdirilməsi istiqamətində məqsədyönlü işlər görüldüyünü
bildirərək kəndlərdə arx və kanallarda aparılan təmizlik işlərinin
əhəmiyyətindən söz açıb. Qeyd edib ki, ildən-ilə genişləndirilən əkin sahələrinin,
xüsusilə də məhsuldarlığın artırılmasının başlıca əsas səbəblərindən biri
bitkilərin vaxtlı-vaxtında suvarma suyu ilə təmin olunması və suvarılmanın
optimal müddətdə başa çatdırılmasıdır. Bu məqsədlə
2017-ci ildə 269,71 km arx və kanalların təmizlənməsi nəzərdə tutulduğu halda
274,78 km məsafədə təmizlənmə işinin aparılması, 2018-ci ildə də 261,19 km
məsafəyə qarşı 302,44 km arx və kanallarda təmizlik işləri görülməsi bu dediklərimizin
əyani sübutudur. 2019-cu ildə isə 266,58 km məsafədə arx və kanallarda təmizlik
işlərinin aparılması nəzərdə tutulmuşdur. Bunun da 140,13 km-i əl əməyi,
126,45 km-i isə texnika vasitəsilə həyata keçirilməsi
planlaşdırılır. Lakin əvvəlki illərdə olduğu kimi, 2019-cu ildə də bu rəqəmin
artacağı gözlənilir. Belə ki, bu gün ümumi rayon üzrə təmizlənməsi
nəzərdə tutulan 266,58 km-in 225,09 km-i təmizlənib ki, bunun da 136,37
km-i əl əməyi, 88,72 km-i isə texnika vasitəsilə həyata keçirilib. Qeyd edib ki, Ağköynək-Qarapapaq kəndləri üzrə nəzərdə tutulan 16,20 km məsafədə ola arxlar alaq
otlardan, lildən təmizlənir. 4,90 km-i texnika, 8,00 km-i əl əməyi ilə olmaqla
həyata keçirilən işlərə ilk gündən sürətlə başlanılıb. Bu günə kimi 10,50 km təmizlənib
ki, bunun da 4,84 km-i texnika, 5,66 km-i isə əl əməyi ilə aparılıb.
Ötən il rayonda yeni iş yerlərinin
yaradılması istiqamətində həyata keçirilən tədbirlərdən danışan rayon rəhbəri həmin
işlərin 2019-cu ildə də davam etdiriləcəyini qeyd edib. Buna misal olaraq
başlanılması nəzərdə tutulan su-kanalizasiya xəttinin, Gəncə-Qazax-Gürcüstan
dövlət sərhəddi avtomobil yolunun çəkilməsini, "Saloğlu” fərdi mebel
firması tərəfindən yeni tikiləcək fabrikin inşasını göstərib. Bildirib
ki, Azərbaycan Respublikasının Nazirlər Kabinetinin 21 sentyabr 2018-ci il
tarixli, 637s saylı Sərəncamı ilə Qazax rayonunun Ağköynək kəndi ərazisində
"Saloğlu” fərdi firması tərəfindən həyata keçiriləcək "Venzana” layihəsi
üçün nəzərdə tutulmuş 30558 hektar torpaq sahəsi kənd təsərrüfatı təyinatlıdan
sənaye təyinatlı torpaqlar kateqoriyasına keçirilmişdir. Hazırda layihənin həyata
keçirilməsi üçün tikinti işlərinə başlanılmışdır. Bu isə rayonda yeni iş yerlərinin
açılması və əhalinin maddi rifah halının yaxşılaşdırılması deməkdir. İcra başçısı 2018-ci
ilin rayonumuzda təhsil sahəsində də yaddaqalan olduğunu vurğulayaraq
"Yeniləşən Azərbaycana yeni məktəb” layihəsinin uğurla icra edilməsini, əsaslı
şəkildə yenidən qurulan S.Vurğun adına şəhər 2 nömrəli tam orta məktəbdə görülən
işləri bunun əyani sübutu kimi qiymətləndirib. Bundan əlavə, bu il rayonda daha
3 məktəbin – Kosalar, Qaymaqlı və Kəmərli kənd məktəblərinin də əsaslı şəkildə
yenidən qurulmasının nəzərdə tutulduğunu bildirib. Rayon rəhbəri
vurğulayıb ki, yola saldığımız il həm də ölkəmizdə elmin, təhsilin inkişafında xüsusi
rolu olan Qazax rayonunun ziyalılarına verilən qiymətlə yadda qaldı. Qazax Müəllimlər
Seminariyasının 100 illik yubileyinin qeyd olunması ilə bağlı ölkə başçısının
verdiyi 3 noyabr 2018-ci il tarixli Sərəncamla ötən il əlamətdar oldu. Ən əsası
isə bu Sərəncam onu göstərdi ki, Qazax hər zaman ziyalıları, tarixi şəxsiyyətləri
ilə seçilib. Rayon rəhbəri qeyd
edib ki, bu il qəbul imtahanlarının nəticələrinə görə Qazaxın respublika məktəbləri
arasında 3-cü yerdə dayanması, qazaxlı məktəblilərin "Ölkəmizi tanıyaq”
tur-aksiyasından birinci yeri tutaraq qalib kimi qayıtmaları Qazaxda təhsil sahəsinə
göstərilən qayğının öz bəhrəsini verdiyini bir daha göstərdi. Bu uğurda
Ş.Çobanov adına Ağköynək kənd tam orta məktəbin də payının olduğunu qeyd edən
rayon rəhbəri bildirib ki, bu il məktəbi bitirən 22 məzundan 19 nəfərinin ali,
3 nəfərinin orta ixtisas məktəbinə daxil olması bunun əyani göstəricisidir. Rayonda azyaşlı körpələrə
göstərilən diqqət və qayğıdan, onların sağlam, hərtərəfli və düzgün böyüməsi, təlim-tərbiyə
olunması üçün yaradılan şəraitdən söz açan icra başçısı bu gün rayon üzrə
olan 25 bağçadan 18-nin müasir standartlara cavab verən səviyyəyə
çatdırıldığını qeyd edib. Vurğulayıb ki, ötən il bağçalarda aparılan quruculuq
işləri bu il də davam etdiriləcəkdir. Rayonda daha 7 bağçanın - İkinci Şıxlı kəndində
2, Aşağı Salahlı, Qazaxbəyli, Kosalar, Daş Salahlı, Hüseynbəyli kəndlərinin hər
birində 1 bağçanın təmir olunmasının nəzərdə tutulduğunu bildirib. Qeyd edib
ki, bu gün rayon üzrə bir neçə kənddə bağça yoxdur ki, həmin kəndlərdən biri də
Ağköynək kəndidir. Digər kəndlərdə olduğu kimi, bu kənddə də bağçanın olması
üçün lazımi tədbirlərin görülməsi üçün aidiyyəti təşkilatlar qarşısında məsələ
qaldırıldığını bildirib. Rayon rəhbəri yola
saldığımız 2018-ci ilin əhalinin mənzil-məişət şəraitinin yaxşılaşdırılması
istiqamətində görülən işlərlə də yadda qaldığını bildirib. Son iki il yarımda
rayonda olan 163 ədəd çoxmənzilli yaşayış binasından artıq 129-nun təmir
olunmasını və sakinlərin istifadəsinə verilməsini, bundan əlavə, rayonda
sakinlərin istəyini nəzərə alaraq çoxmənzilli binaların həyətlərində xeyir-şər
evlərinin tikilməsini yüksək dəyərləndirib. Həmin işlərin uğurla davam
etdirildiyini və şəhərdə daha 4 binanın təmirinə başlanıldığını diqqətə
çatdırıb. İcra başçısı qeyd edib
ki, Prezident İlham Əliyevin rəhbərliyi ilə bütün sahələrlə yanaşı, yol
infrastrukturunun inkişafı istiqamətində də məqsədyönlü tədbirlər həyata
keçirilir. Ölkə başçısının respublika və yerli əhəmiyyətli yolların yenidən
qurulması, ən ucqar dağ kəndlərinə belə yeni yolların çəkilməsi ilə bağlı
imzaladığı çoxsaylı Sərəncamlar bunun əyani sübutudur. Bildirib ki, dövlət
başçısının yeni avtomobil yollarının çəkilməsi ilə bağlı verdiyi tapşırıq və
tövsiyələr, Sərəncamlar Qazaxda da uğurla icra olunur. Bu gün rayonda olan yüksək
keyfiyyətli yollara Qazaxbəyli-Orta Salahlı-Aşağı Salahlı, Yuxarı Salahlı-Kəmərli,
Kosalar, Quşçu Ayrım, Canalı, Çaylı, Bala Çaylı, Hüseynbəyli, Cəfərli kəndlərində
yeni asfalt yolların çəkilişini misal olaraq göstərib. Rayon rəhbəri hazırda
uzunluğu 16 km olan Daş Salahlı-Ürkməzli-Dəmirçilər kənd yolunun da yenidən
bərpa olunduğunu bildirib və bu istiqamətdə görülən işlərin bundan sonra da
davam etdiriləcəyini diqqətə çatdırıb. Artıq 4,5 km uzunluğu olan Ürkməzli-Dəmirçilər
yolunun yenidən qurularaq kənd sakinlərinin istifadəsinə verilməsini vətəndaşların
rahatlığının təmin olunması sahəsində görülən işlər kimi qiymətləndirib. İcra
başçısı qeyd edib ki, bir neçə kəndin yolunun təmir olunmasına ehtiyac var ki,
həmin kəndlərdən biri də Ağköynək kəndidir. Rayonda su-kanalizasiya sistemi
yeniləndikdən sonra bu kəndin yolunda da işlərin görülməsi nəzərdə tutulub. Rayonda, eləcə də kəndlərdə elektrik enerjisi və mavi
yanacaqla bağlı heç bir problemin olmadığını qeyd edən rayon rəhbəri bu
istiqamətdə görülən işlərdən də söz açıb. Bu gün rayonun sərhəd kəndləri olan
Məzəm, Quşçu Ayrım, Fərəhli, Cəfərli və Bala Cəfərli kəndlərində SİB kabelləşmə
işinin tam başa çatdığını qeyd edib. İcra başçısı digər kəndlərdə olduğu kimi, Ağköynək
kəndində də bir sıra işlərin həyata keçirildiyini qeyd edərək həmin işlərə kənd
ərazisində məişət tullantıları üçün ayrılmış zibil poliqonunda həftədə
bir dəfə traktorla təmizlik işlərinin aparılmasını, bundan əlavə, həmin sahənin
ətrafına 60 ədəd dəmir dayaq basdırılaraq 320 metr uzunluğunda dəmir tor
çəkildiyini bildirib. Ağköynək kəndində də əhalinin elektrik enerjisi və mavi
yanacaqla tam təmin olunduğunu diqqətə çatdırıb. Görüşdə çıxış edən kənd sakinlərindən şəhid atası
Məhyəddin Çobanov, Ağköynək kənd tam orta məktəbin direktoru Səfurə Rəhimova,
məktəbin müəllimi Sədaqət Əmirxanova, Arzuman Xasməmmədli və başqaları çıxış
edərək Ağköynək kəndində görülən işlərə görə Respublika Prezidenti İlham
Əliyevə öz dərin minnətdarlıqlarını bildirib, Rayon İcra Hakimiyyətinin başçısı
Rəcəb Babaşova təşəkkürlərini çatdırıblar. Sakinlərdən Xaliq İsmayılovun, Səidə Eyyubovanın,
Fariz Eyyubovun, Aydın Cəfərovun işlə təmin olunmaq barədə, Səlminaz
Rəhimovanın, Mahir Abdullayevin, Güləfirə Cəfərovanın, Aygün Abdullayevanın
evin təmirinə köməklik və digər müxtəlif səpkili müraciətləri rayon rəhbərliyi
tərəfindən müvafiq olaraq cavablandırılıb. GOYEZEN.AZ
Rayon rəhbəri yenicə qədəm qoyduğumuz 2019-cu ilin ilk səyyar görüşünü Ağköynək kənd sakinləri ilə keçirib. Görüşdə kənd sakinləri
ilə yanaşı, aidiyyəti idarə, müəssisə və təşkilatların rəhbərləri də iştirak
ediblər.
Facebook-da paylaş