Qazaxda "Ölkəmizi tanıyaq” tur-aksiyasından qələbə ilə qayıdan məktəblilərlə görüş keçirilib
Bildiyiniz kimi, Azərbaycan
Respublikasının Prezidenti İlham Əliyevin tövsiyəsinə əsasən Prezident
Administrasiyasının təşkilatçılığı ilə 2014-cü il avqustun 1-dən şəhər və Rayon
İcra Hakimiyyətləri tərəfindən IX-XI sinif şagirdləri üçün "Ölkəmizi tanıyaq”
devizi altında maarifləndirici tur-aksiyaların keçirilməsinə
başlanılmışdır. Məktəblilərin iştirak
etdiyi və daha bir mərhələsi uğurla başa çatan "Ölkəmizi tanıyaq” layihəsininəsas
məqsədi gəncləri Azərbaycanın müxtəlif bölgələrinin tarixi, mədəni irsi, adət-ənənələri,
özünəməxsus xüsusiyyətləri ilə yaxından tanış etmək, Heydər Əliyevin rəhbərliyi
ilə müstəqillik illərində əldə olunan nailiyyətlərin dərindən öyrənilməsinə
nail olmaq, eyni zamanda, Prezident İlham Əliyevin qətiyyəti və iradəsi ilə ölkəmizin
hazırkı dinamik sosial-iqtisadi inkişafını, gündən-günə abadlaşan şəhər və
rayonlarımızın müasir simasını əyani, praktik olaraq göstərməkdir. Respublika Prezidenti İlham
Əliyev "Ölkəmizi tanıyaq” layihəsinin əhəmiyyətindən danışarkən
qeyd etmişdir ki, bu yüksəliş, bu dinamik inkişaf Azərbaycanın müstəqillik illərində
doğulan, ölkənin sabahı olan Azərbaycan vətəndaşlarının-Azərbaycanın yeni nəslinin
gözləri önündə baş verir. Bizdən sonra gələn nəsil bizim kimi vətənpərvər, Vətənə
bağlı olmalıdır ki, gələcəkdə Azərbaycan güvənli gəncliyə etibar edilsin. Bunu
etmək üçün biz möhkəm təməl qoyuruq və bu gün başlanan, icra edilən layihələrin
bir çoxu gələcəyə hesablanır. Bəli, aksiya çərçivəsində ölkə
gəncləri ölkəmizin qədim tarixi, mədəniyyət abidələri ilə tanış olur, bölgələrimizin
müasir simasını əks etdirən Heydər Əliyev Mərkəzlərinə, Bayraq Meydanları və
muzeylərinə, Gənclər Mərkəzlərinə, Rəsm Qalereyalarına, Tarix-Diyarşünaslıq Muzeylərinə,
istehsal və emal müəssisələrinə baxış keçirir, park və xiyabanları gəzərək,
qoruq və göllərə ekskursiya edirlər. Bu
gəzintilər ölkəmizin tarixini dərindən öyrənməklə yanaşı, gənclərimizə Heydər
Əliyevin siyasi irsi, ulu öndərin rəhbərliyi ilə milli dövlət quruculuğu sahəsində
əldə olunmuş misilsiz nailiyyətlərlə, Prezident İlham Əliyevin həyata keçirdiyi
dinamik sosial-iqtisadi inkişaf və böyük quruculuq işləri ilə hər bir şəhər və
rayonun nümunəsində tanış olmaq imkanı yaradır. Bu il noyabrın 14-17 və 18-21
tarixlərini əhatə edən növbəti 10-cu tur-aksiyasında isə 4 istiqamət üzrə 76 şəhər
və rayondan, o cümlədən, məcburi köçkün rayonlarından, ümumilikdə, 3190 nəfər
iştirak etmişdir. Bununla da "Ölkəmizi tanıyaq” tur-aksiyalarında iştirak edən
məktəblilərin sayı 23 min 444 nəfər olmuşdur. Sevindirci
haldır ki, ölkə başçısı İlham Əliyevin tapşırığına əsasən respublikamızın şəhər
və rayonlarının IX-XI sinif şagirdləri üçün təşkil olunmuş "Ölkəmizi tanıyaq”
layihəsi hər il Qazax rayonunda daha
yaddaqalan olur və təntənəli şəkildə keçirilir. Qazax Rayon
İcra Hakimiyyətinin başçısı Rəcəb Babaşov fəaliyyətə başladığı ilk gündən təhsil
sahəsinə xüsusi diqqət və qayğı göstərir. Rayon məktəblilərinin daha savadlı,
bilikli olması, intellektual səviyyələrinin artması üçün bu sahədə məqsədyönlü
işlər görür. Rayon rəhbərinin "Ölkəmizi tanıyaq” layihəsinə
olan yanaşması isə tam başqadır. İcra başçısı respublika səviyyəsində həyata
keçirilən və böyük əhəmiyyət kəsb edən bu layihəyə xüsusi diqqət ayırır. Rayon rəhbərinin hər
il "Ölkəmizi tanıyaq” layihəsininiştirakçıları ilə istər yola düşməzdən əvvəl, istərsə də qayıtdıqdan sonra
görüşlər keçirməsi, xüsusilə də yolasalma və qarşılanma mərasimlərində şəxsən
iştirak etməsi, onlara uğurlar arzulaması məktəblilərə göstərilən diqqət və
qayğının bariz nümunəsidir. Rayon rəhbərinin keçirdiyi bu cür görüşlər artıq
bir ənənə şəklini alıb desək yanılmarıq. Bu gün də "Ölkəmizi
tanıyaq” tur-aksiyasından qələbə sevinci ilə qayıdan iştirakçılarla görüş
keçirilib. Qazax Rayon İcra Hakimiyyətinin akt zalında keçirilən tədbirdə icra
aparatının məsul işçiləri, rayon Təhsil şöbəsinin əməkdaşları, məktəb
direktorları, rayonda Əməkdar
və fəxri adlar almış müəllimlər, turda iştirak edən məktəblilər və onları müşayiət
edən şəxslər, KİV nümayəndələri iştirak
ediblər.
Qazax Rayon İcra Hakimiyyətinin başçısı Rəcəb
Babaşov çıxış edərək qeyd edib ki, bu dəfə də şagirdlərimiz rayonumuza əliboş
qayıtmadı. "Ölkəmizi tanıyaq” layihəsində Azərbaycan İntellektual Klublar
Assosiasiyası tərəfindən təşkil olunmuş "Nə?, harada?, nə zaman?” adlı
intellekt yarışmasından qələbə sevinci ilə döndülər. 9 rayon arasında keçirilən
bilik yarışında öz bilik və bacarıqlarını, ən əsası da Qazaxın ziyalılar yurdu
olduğunu bir daha nümayiş etdirdilər. Hər rayon üzrə 6 komanda olmaqla,
ümumilikdə 54 komandanın iştirak etdiyi yarışda rayonumuzun "Göyəzən”
komandası 1-ci yeri qazanaraq Assosiasiya tərəfindən Kuboka, Sertifikata və
medallara layiq görüldülər. Bundan əlavə, məktəblilər "Asan həyat"
kompleksindəki "İntellektual mərkəz"də "Breyn Rinq"
yarışmasında da biliklərini sınadılar və qalib oldular.
Qələbə sevinci ilə qayıdan məktəbliləri təbrik edən
rayon rəhbəri qazanılan bu uğuru dövlət başçısı İlham Əliyevin Qazax Müəllimlər
Seminariyasının 100 illik yubileyinin qeyd olunması ilə bağlı imzaladığı 3
noyabr 2018-ci il tarxli Sərəncamına əsl töhfə olduğunu bildirib. İcra başçısı
qeyd edib ki, bu qələbə bir daha onu sübut etdi ki, Qazax hər zaman ziyalılar,
tarixi şəxsiyyətlər yurdu olub və bu, bundan sonra da belə olacaqdır. Təkcə
Qazax Müəllimlər Seminariyası onu deməyə əsas verir ki, rayonda savadlı gənclər
ordusu yetişir, bilikli gənclərimizin sayı gündən-günə artır. Bu tur-aksiyada
da yaxşıların yaxşısı iştirak edirdi və qazandıqları qələbə də bunu bir daha
sübut etdi ki, biz seçimimizdə yanılmamışıq. Məktəblilərin qazandıqları bu qələbə
onların bilik səviyyəsini nümayiş etdirməklə yanaşı, "Bura Qazaxdı” fikrini bir
daha təsdiqlədi. Çünki biz o kəlmələri elə-belə işlətmirik. Qazax hər zaman
böyük bir ziyalı ordusu ilə tanınıb. İcra başçısı respublikamızda, eləcə də bölgələrimizdə
təhsilə dövlət səviyyəsində göstərilən diqqət və qayğıdan söz açaraq bu sahədə
görülən məqsədyönlü işlərdən danışıb. Ölkəmizdə "Yeniləşən Azərbaycana yeni məktəb”
layihəsinin uğurla icra edildiyini bildirən rayon rəhbəri hazırda rayonumuzda əsaslı
şəkildə yenidən qurulan 964 şagird yerlik S.Vurğun adına şəhər 2 nömrəli tam
orta məktəbdə görülən işləri əyani sübutu kimi qiymətləndirib. Bundan əlavə,
növbəti tədris ilində rayonda daha 3 məktəbin – Kosalar, Qaymaqlı və Kəmərli kənd
məktəblərinin də əsaslı şəkildə yenidən qurulmasının nəzərdə tutulduğunu
bildirib. Rayon rəhbəri vurğulayıb ki, ölkə başçısının, təhsil
nazirinin təhsil sahəsinə göstərdikləri diqqət və qayğının nəticəsidir ki, bu
sahə gündən-günə inkişaf edir, qazanılan uğurları, əldə edilən nailiyyətləri ilə
seçilir. Sevindirici haldır ki, dövlət tərəfindən göstərilən bu qayğını yüksək
dəyərləndirən qazaxlı məktəblilər öz uğurları ilə ölkə təhsilinə töhfə verirlər.
Bu il qəbul imtahanlarının nəticələrinə görə Qazaxın respublika məktəbləri
arasında 3-cü yerdə dayanması bütün bu dediklərimizin əyani sübutudur.
RİHBA-da aparıcı məsləhətçi-psixoloqu, tur rəhbəri Kəmalə Cəfərova
çıxış edərək "Ölkəmizi
tanıyaq” tur-aksiyası barədə ətraflı məlumat verib, məktəblilərin qazandıqları
qələbə sevinci ilə bağlı təəssüratlarını bölüşüb. Qeyd edib ki, bu qələbənin
qazanılmasında noyabr ayının 10-da Qazax Rayon İcra Hakimiyyətinin
təşkilatçılığı ilə hazırlanmış ”Rayonumuzu tanıyaq”devizi altında təşkil olunmuş turun da böyük əhəmiyyəti oldu. Belə
ki, məktəblilər ilk öncə and yerimiz, qəhrəmanlıq
məbədgahımız olan Şəhidlər Xiyabanını gül dəstələri ilə ziyarət etdilər. Sonra "Azərxalça”
ASC-nin Qazax filialında, Ədəbiyyat Muzeyində, Abbasbəyli kənd ərazisində yerləşən,
Qazaxımızın simvolu olan "Göyəzən” dağında, Daş Salahlı kəndindəki "Damcılı”
mağarasında oldular. "HGC Group” MMC (Qazax Sement Zavodu) və "Birinci Şıxlı Kəndli
Fermer Təsərrüfatı”, Yuxarı Salahlı kəndində yerləşən dahi şairimiz Səməd
Vurğunun Poeziya Evi, Qazax Tarix-Diyarşünaslıq muzeyi ilə tanış oldular. Bu
tanışlıq uşaqlarımzda rayonumuzun gəzməli, görməli yerləri haqqında zəngin təəssüratlar
formalaşdırdı və məlumat əldə etmələrində böyük rol oynadı. Ən əsası da
ekskursiya etdikləri rayonlarla Qazaxı müqayisə etməkdə yardımçı oldu.
K.Cəfərova bildirib ki, Qazax məktəbliləri tur-aksiya zamanı nəinki
intellektual səviyyələri ilə, eyni zamanda tərbiyələri və etik davranışları ilə
digər rayonların məktəblilərindən xüsusilə fərqləniblər. Layihə haqqında fikirlərini bölüşərək qeyd edib ki,
bu layihə adi bir layihə deyil, Azərbaycanın yeni nəslinin vətənpərvərlik ruhunda
tərbiyəsində mühüm rol oynayacaq bir addımdır. Möhtərəm prezidentimiz İlham
Əliyevin təşəbbüsü, tapşırığı və nəzarəti ilə həyata keçirilən, Azərbaycanın
sabahını düşünərək reallaşdırılan, dövlət başçısının gənclərə həssas münasibətini,
diqqət və qayğısını təcəssüm etdirən bir layihədir. Daha obrazlı desək, bu
layihə Azərbaycanın tərəqqisini göstərən güzgü, Vətənə həsr olunmuş "Vətənpərvərlik
nəğməsi”dir. Respublikamızın ictimai və mədəni həyatında çox mühüm hadisəyə
çevrilən "Ölkəmizi tanıyaq” tur–aksiyası ölkə vətəndaşları tərəfindən böyük
razılıq hissi və rəğbətlə qarşılanır. Qazax ziyalısı kimi məktəblilərin
dünyagörüşünün daha da zənginləşməsinə, gənclərin vətənpərvərlik və azərbaycançılıq
prinsipləri əsasında tarixi-mədəni irsimizə hörmət ruhunda tərbiyə olunmasına
xidmət edən, yeni Azərbaycanı yeni nəsillərə tanıdan, sevdirən, onları milli
tarixi kökə bağlayan, gələcəyə hazırlayan bu misilsiz layihəyə, gənclərimizə
belə canlı, real Vətən sevgisinin aşılanmasında gəncliyə əvəzsiz xidmətinə görə
ilk öncə möhtərəm Prezident İlham Əliyevə, rayon rəhbərliyinə dərin minnətdarlığını bildirib.
Rayon Təhsil şöbəsinin müdiri Nizaməddin Babanlı çıxış edərək qələbə
münasibətilə məktəbliləri təbrik edib, hər zaman rayon təhsilini yüksəklərə
qaldırmalarını arzulayıb. Rayon rəhbərliyinin fəaliyyətə başladığı ilk gündən təhsil
sahəsinə xüsusi qayğı ilə yanaşmasını yüksək qiymətləndirərək rəhbərlik etdiyi
kollektiv adından dərin minnətdarlığını çatdırıb. Qazax Rayon İcra Hakimiyyəti
ilə rayon təhsil şöbəsi arasındakı səmimi münasibətə görə təşəkkürlərini
bildirib və qazanılan uğurların təməlində məhz bu səmimiyyətin, qayğının
dayandığını qeyd edib. Tur-aksiyaya təhkim olunmuş Kosalar kənd tam orta məktəbin direktoru Samir
Hüseynov çıxış edərək bildirib ki, sizin məktəblilərin yolasalma mərasimində şəxsən
iştirak etməyiniz uşaqların üzərinə məsuliyyət hissi qoymaqla yanaşı, onlarda qələbə
qazanacaqlarına əminlik hissi də yaratdı. Onlar qarşılarına qoyduqları məqsədə
çatmaq üçün böyük səylə çalışdılar və buna da nail oldular.
Tur-aksiya iştirakçılarından - Bala Çaylı kənd tam orta məktəbin X sinif şagirdi Günay Quliyeva, şəhər
1 saylı tam orta məktəbin X sinif şagirdi Elçin Bayramlı, Aşağı Salahlı kənd
tam orta məktəbin IX sinif şagirdi Rasim Qasımov, Ağköynək kənd tam orta məktəbin
X sinif şagirdi Turanə Əliyeva, Kosalar kənd tam orta məktəbin XI sinif şagirdi
Mədinə Mustafayeva tur-akisya barədə təəssüratlarını
bölüşərək bildiriblər ki, bu ekskursiyalar ölkәmizin tarixini dәrindәn
öyrәnmәklә bərabər, bizlərә ümummilli lider Heydәr Әliyevin rәhbәrliyi ilә
milli dövlәt quruculuğu sahәsindә görülmüş işlәrlә, Respublika Prezidenti İlham
Әliyevin hәyata keçirdiyi dinamik sosial-iqtisadi inkişafla hәr bir şәhәr vә
rayonun nümunәsindә tanış olmaq imkanı yaratdı. Biz məktəblilər regionlarımızın müasir simasını əks
etdirən Heydər Əliyev Mərkəzləri, bölgələrin qədim tarixi, mədəniyyət
abidələri, Tarix-Diyarşünaslıq Muzeyləri, Gənclər Mərkəzləri, Bayraq
Meydanları, Rəsm Qalereyaları ilə tanış olduq. Olduğumuz bölgələrdə
gördüklərimiz, şahidi olduqlarımız bir daha onu sübut etdi ki, Qazaxımız kimi
digər rayonlarımız da ölkə başçısının rəhbərliyi altında gündən-günə
çiçəklənir, daha abad və yaraşıqlı olur. Biz həm də ona görə sevincliyik ki,
intellektual yarışdan qələbə ilə qayıtdıq. Bu, təkcə bizim uğur deyil, ümumilikdə,
Qazax təhsilinin uğurudur. Biz şagirdlər də bu cür tur-aksiyanın
keçirilməsinə görə ölkə başçısı İlham Əliyevə öz dərin minnətdarlığımızı
bildiririk. Bizlərə həmişə dəstək olduğu üçün Qazax Rayon İcra Hakimiyyətinin
başçısı Rəcəb Babaşova təşəkkür edirik. Xanlıqlar kənd tam orta məktəbin IX sinif şagirdi Asim
Şahbazlı isə "Qazaxdı” şeirini söyləyərək qələbə qazanan həmyaşıdlarını
təbrik edib, üzərilərində əməyi keçən müəllimlərinə, tur-aksiyada iştirak edən
təhkimçilərə aksiya iştirakçıları adından minnətdarlıq edib. Məktəblilərlə keçirilən görüşdə iştirak edən M.Hüseyn
adına məktəb-liseyin direktoru Tahirə Comərdova, Xanlıqlar kənd tam orta
məktəbin biologiya müəllimi, Əməkdar müəllim Xatın Hüseynxanova çıxış edərək
təhsil sahəsinə göstərdiyi diqqət və qayğıya görə ölkə başçısı İlham Əliyevə,
hər zaman müəllimlərə, məktəblilərə göstərdiyi səmimi münasibətə görə Qazax
Rayon İcra Hakimiyyətinin başçısı Rəcəb Babaşova bütün təhsil işçiləri,
müəllimlər adından dərin minnətdarlıqlarını bildiriblər. Bugünkü görüşü
şagirdlərə göstərilən qayğının ən bariz nümunəsi kimi qiymətləndiriblər. Görüşdə 14-17 noyabr 2018-ci
il tarixlərində keçirilmiş "Ölkəmizi tanıyaq” tur-aksiyasında fəal
iştiraklarına görə aksiyaya təhkim olunmuş şəxslər Qazax Rayon İcra Hakimiyyəti
başçısının Fəxri Fərmanı ilə təltif olunublar. Bizlərə qələbə sevincini yaşadan "Göyəzən”
komandasının üzvlərinə isə "Ölkəmizi
tanıyaq” layihəsində təşkil olunmuş yarışmada qazandıqları uğurlara görə Azərbaycan
İntellektual Klublar Assosiasiyasının Sertifikatları və hədiyyələr təqdim
edilib. Bundan əlavə, bütün tur-aksiya iştirakçılarına rayon rəhbərliyi tərəfindən
hədiyyə verilib. Qazax Rayon
İcra Hakimiyyətinin başçısı Rəcəb Babaşov görüşə yekun vuraraq qazandıqları
nailiyyətlərə, eləcə də "Ölkəmizi tanıyaq” tur-aksiyasında nümunəvi
iştiraklarına görə məktəbliləri bir daha səmimi qəlbdən təbrik edib, qələbələrinin
daimi olmasını arzulayıb. Hər zaman müəllimlərinin, valideynlərinin onlara göstərdikləri
etimadı öz uğurları ilə doğrultmalarını tövsiyə edib. GOYEZEN.AZ
Facebook-da paylaş