Yuxarı Salahlıda tikilən həkim məntəqəsində işlər başa çatıb
"Regionların
sosial-iqtisadi inkişafı Dövlət Proqramı”nın Qazax rayonunda uğurla icra
olunmasının nəticəsidir ki, istər şəhər mərkəzində, istərsə də kəndlərdə
aparılan genişmiqyaslı tikinti-quruculuq, abadlıq və yenidənqurma işləri geniş
vüsət alıb. Bütün sahələr üzrə olan bu abadlıq işləri səhiyyə sahəsində də özünü
göstərir. Şəhərdə inşa edilən 145 çarpayılıq Mərkəzi Xəstəxana binasının
tikintisi ilə yanaşı, kəndlərdə də yeni tibb məntəqələri inşa olunur.
Xəbər verdiyimiz kimi, rayonun Yuxarı
Salahlı kəndində tikilən yeni həkim məntəqəsi bu sahədə görülən işlərin əyani
sübutudur. Bir neçə ay öncə Yaponiya səfirliyinin maliyyə dəstəyi ilə tikintisinə
başlanılan məntəqədə işlər başa çatıb.
Bu gün Qazax Rayon İcra
Hakimiyyətinin başçısı Rəcəb Babaşov həkim məntəqəsində görülən son tamamlanma işləri
ilə tanış olub. Məntəqədə həyət-abadlıq işlərinin aparılması, eləcə də açılışa
hazırlıqla bağlı bəzi tapşırıq və tövsiyələrini verib.
Qərb-Resurs Vətəndaş
Cəmiyyətinin İnkişafına Dəstək İctimai Birliyinin sədri, layihə rəhbəri Ramil
Göyüşov rayon rəhbərinə bildirib ki, tikinti işləri başa çatıb, bütün
avadanlıqlar quraşdırılıb və məntəqə açılışa tam hazırdır.
Məlumat üçün bildirək ki,
rayon rəhbərliyinin dəstəyi ilə məntəqənin qarşısında 30 kv.m ərazini əhatə
edən çardaq quraşdırılıb, giriş qapısının və pəncərələrin kənarlarına aqlaydan
haşiyələr vurulub, eyni zamanda, tibb məntəqəsinin qarşısında yolun çəkilməsi
işləri aparılıb.
Yaponiya səfirliyinin,
Azərbaycan Respublikasının Səhiyyə Nazirliyinin və Qazax Rayon İcra
Hakmiyyətinin birgə razılığı əsasında Qərb-Resurs Vətəndaş Cəmiyyətinin
İnkişafına Dəstək İctimai Birliyi tərəfindən tikilən həkim məntəqəsinin ümumi
sahəsi 216 kv.m-dir. 8 otaqdan ibarət olacaq həkim məntəqəsində həkim və
tibb işçilərinin əhaliyə yüksək səviyyədə xidmət göstərmələri üçün hər cür
şərait yaradılıb.
GOYEZEN.AZ
Facebook-da paylaş