Bala Çaylı kəndində sakinlərlə səyyar görüş keçirilib
Xalqın arasında olmaq, əhalini
narahat edən problemləri onların dilindən eşitmək məqsədilə Rayon İcra Hakimiyyətinin
başçısı Rəcəb Babaşovun istər şəhərdə, istərsə də kəndlərdə keçirdiyi səyyar
görüşlər artıq bir ənənə şəklini alıb. Fəaliyyətə başladığı ilk gündən vətəndaş
amilini, mövqeyini hər şeydən üstün tutan icra başçısının mütəmadi olaraq kəndlərə
getməsi, səyyar görüşlər keçirməsi, mövcud çatışmazlıqları yerindəcə öyrənərək
həlli istiqamətində lazımi tapşırıqlar verməsi bu ənənənin ötən 2 il 3 ay ərzində
uğurla icra olunması deməkdir. Bu gün Bala Çaylı kəndində
keçirilən səyyar görüş də bu dediklərimizin əyani sübutudur. Məhz keçirilən görüşlərin, göstərilən yüksək
diqqət və qayğının nəticəsidir ki, kənd sakinləri ilə rayon rəhbərliyi arasında
isti bir münasibət yaranıb. Hər bir kənd sakini tərəfindən qaldırılan problem və çatışmazlıqların yerindəcə həll olunması
səyyar görüşlərin böyük səmərə verdiyini bir daha göstərir və vətəndaşda dövlətə,
rəhbərə inam hissini artırır. Bala Çaylı kəndi də rayon rəhbərliyinin daim
diqqət mərkəzində saxladığı kəndlərdən biridir. Rayon rəhbərinin fəaliyyətə
başladığı ilk gündən digər kəndlərlə yanaşı, bu kəndə də xüsusi qayğı ilə
yanaşmasının nəticəsidir ki, sakinlər hər görüşdə böyük sevinc hissi ilə öz
razılıqlarını bildirirlər. Rayon İcra Hakimiyyətinin başçısı Rəcəb
Babaşov görüşdə çıxış edərək bildirib ki, bu ilin proqramına uyğun olaraq növbəti
dəfə sizlərlə görüş keçiririk. Belə səyyar görüşlər keçirməyimin əsas məqsədi
siz sakinləri narahat edən məsələləri öz dilinizdən eşitmək və həlli istiqamətində
əməli işlər görməkdir. İcra başçısı qeyd edib ki, bildiyiniz kimi, kəndin
adı sovet dövründən qalan köhnə Kommuna adı ilə adlandırılmışdı. Siz sakinlərin
təklifinə uyğun şəkildə haqlı olaraq məsələ qaldırıldı və aidiyyəti təşkilatlara
müraciət olundu. Çox sağ olsun ki, dövlətimiz və dövlət başçımız tərəfindən təklifimizə
müsbət münasibət bildirildi, yüksək dəyərləndirildi və kəndin adı dəyişdirilərək
Bala Çaylı adlandırıldı. Rayon rəhbəri bildirib ki, Prezident İlham
Əliyevin siyasətinin əsasını təşkil edən vətəndaş amilinin Qazax rayonunda
olduğu kimi, həyata keçirilməsinin nəticəsidir ki, bu gün rayonumuz istər
tikinti-quruculuq, istərsə də kənd təsərrüfatı sahəsində özünün intibah dövrünü
yaşayır. Bunu ölkə
başçısının apardığı quruculuq siyasətinin son 2 il 3 ay ərzində Qazaxda olduğu
kimi, həyata keçirilməsindən də aydın şəkildə görmək olur. "Regionların sosial-iqtisadi inkişafı Dövlət
Proqramı”na uyğun olaraq rayonda aparılan genişmiqyaslı tikinti-quruculuq işlərindən,
istifadəyə verilən sosial obyektlərdən, yeni iş yerlərinin yaradılmasından
danışan icra başçısı bütün sahələrin inkişaf etdiyini, uğurlu göstəricilərin əldə
edildiyini bildirib. Rayon rəhbəri bildirib ki, bu gün Qazaxda
tikinti-quruculuq və abadlıq işləri geniş vüsət alıb. "Azərxalça” ASC tərəfindən
xalça müəssisəsi tikilib, "Mətanət A” şirkəti tərəfindən inşa edilmiş Əhəng
zavodu istifadəyə tam hazırdır. Hazırda İkinci Şıxlı kəndində "İnvestel GROUP”
MMC tərəfindən tikilən Aqroparkda son tamamlanma işləri aparılır. "Gedik Carçı Qaynaq” LTD şirkəti tərəfindən inşa edilən Elektrod Zavodunda da işlər yekunlaşıb,
avadanlıqların quraşdırılması işləri aparılır. 2017-ci ilin yanvarından
tikintisinə başlanılan 145 çarpayılıq rayon Mərkəzi Xəstəxanasında demək olar
ki, əsas işlər görülüb, son tamamlanma işləri aparılır. İcra başçısı görüş
zamanı vurğulayıb ki, sürətlə davam etdirilən abadlıq işlərindən biri də
rayonumuzda yol infrastrukturunun inkişaf etdirilməsi və bu istiqamətdə
məqsədyönlü tədbirlərin həyata keçirilməsidir. Qeyd edib ki, bu inkişafı son
iki ildə rayonun Kosalar, Canalı, Kommuna, Çaylı, Hüseynbəyli, Cəfərli
kəndlərinə yeni asfalt yolların çəkilməsindən aydın şəkildə görmək olar. Ölkə
Başçısı İlham Əliyevin Qazax rayonunun Qazax–Uzuntala (9 km)–Cəfərli avtomobil
yolunun tikintisi ilə bağlı tədbirlər haqqında imzaladığı 8 iyun 2018-ci il
tarixli sərancamı bir daha onu sübut edir ki, bölgələrimizdə, eləcə də
rayonumuzda yeni asfalt yolların çəkilişi uğurla davam etdiriləcəkdir. Qeyd
edib ki, rayonun Daş Salahlı və Dəmirçilər kəndlərində də yolların əsaslı
şəkildə təmir olunması nəzərdə tutulmuşdur. Məktəb
tikintisindən danışan rayon rəhbəri bildirib ki, 2016-cı ildən başlayaraq bu
istiqamətdə uğurlu işlər görülür. Elə həmin il Çaylı kənd 1 nömrəli tam orta məktəb
binasının əsaslı təmirdən sonra məktəblilərin istifadəsinə verilməsi bunun əyani
sübutudur. Məkəblərin əsaslı şəkildə və yüksək səviyyədə təmir olunması bu il də
davam edir. Rayon rəhbərliyinin
təşəbbüsü və Təhsil Nazirliyinin xətti ilə dahi şair Səməd Vurğunun adını
daşıyan şəhər 2 nömrəli tam orta məktəbdə əsaslı tikinti işləri aparılır. İlk
gündən təmir işlərinə böyük sürətlə start verilib. İnşaatçılar yeni dərs ilinin
başlanmasına kimi təmir işlərini başa çatdırmaq üçün böyük səylə çalışırlar. Rayonda azyaşlı
körpələrə göstərilən diqqət və qayğıdan danışan rayon rəhbəri onların sağlam,
hərtərəfli və düzgün böyüməsi, təlim-tərbiyə olunması üçün hər cür şərait
yaradıldığını, bu sahədə məqsədyönlü işlərin həyata keçirildiyini bildirib.
Yeni uşaq bağçalarının tikilməsini, əsaslı şəkildə təmir olunaraq yenidən
qurulmasını, müasir inventar və avadanlıqlarla təmin edilməsini bu sahədə
atılan uğurlu addımlardan biri kimi qiymətləndirib. Qazaxbəyli kəndi ərazisində məcburi köçkünlər üçün
salınmış yeni qəsəbədə tikilmiş Aşağı Əskipara kənd körpələr evi-uşaq
bağçasını, şəhər bağçalarından 100 yerlik 1 saylı körpələr evi-uşaq bağçası
üçün yeni binanın tikilməsini, 2 saylı uşaq bağçasının, Daş Salahlı kənd 2 və 3
saylı, Kosalar kənd 2 və 3 saylı, Xanlıqlar kənd körpələr evi-uşaq
bağçalarının, Cəfərli kənd uşaq bağçasının əsaslı şəkildə yenidən qurulmasını,
Canalı, Quşçu Ayrım və Bala Cəfərli kənd uşaq bağçalarının əsaslı təmir
olunmasını göstərmək olar. Bundan başqa, İkinci Şıxlı kənd 2 saylı körpələr
evi-uşaq bağçasında da əsaslı şəkildə yenidənqurma işlərinin başlanıldığını, şəhər
6 saylı körpələr evi-uşaq bağçasında isə yaxın günlərdə işlərə start veriləcəyini
bildirib. Rayon rəhbəri kənd
təsərrüfatı sahəsində qazanılmış uğurlardan söz açaraq bildirib ki, rayonda kənd
təsərrüfatının inkişaf etdirilməsi, məhsuldarlığın artırılması istiqamətində
görülən məqsədyönlü işlərin nəticəsidir ki, son 2 il 3 ay ərzində əkin
sahələrində xeyli sayda artım olmuşdur. Qeyd edib ki, ölkəmizdə
Respublika Prezidenti İlham Əliyevin baramaçılığın və ipəkçiliyin inkişaf etdirilməsi,
bu sahədə ixrac potensialının artırılması və kənd əhalisinin məşğulluğunun
təmin edilməsi məqsədilə imzaladığı
sərəncam, bu sahə ilə bağlı verdiyi tapşırıq və tövsiyələr uğurla icra edilir. Respublikamızın
hər yerində olduğu kimi, Qazaxda da baramaçılığın inkişafı ilə bağlı
məqsədyönlü tədbirlər həyata keçirilir, əməli işlər görülür. 2016-cı ildə
rayonda 1500 kiloqram barama təhvil verilmişdisə, 2017-ci ildə isə bu göstərici
4623 kiloqram olmuşdur. Bu il isə 6260,3 kq kiloqram məhsul rayonda "Şəki-İpək”
ASC-nin nümayəndələrinə təhvil verilmişdir. Əkin
sahələrinin ildən-ilə genişləndirilməsindən söz açan rayon rəhbəri bildirib ki,
2016-cı ildə 16520,6 hektarda, 2017-ci ildə 18694,37 hektarda, 2018-ci ildə
20633 hektarda əkin aparılmışdır. 2016-cı illə 2017-ci ili müqayisə edərkən
yaranan fərq 2173,77 hektar, 2017-ci illə 2018-ci ili müayisə etdikdə isə bu
rəqəm 1938,63 hektar olmuşdur. 2019-cu ildə isə 21476,30 hektarda əkin
işlərinin aparılması nəzərdə tutulmuşdur. Əgər 2019-cu ili 2018-ci illə
müqayisə etsək görərik ki, 843,3 hektar artırılaraq ümumi əkin sahəsi 21476,30
hektara çatdırılmışdır. Icra başçısı
vurğulayıb ki, rayonda kənd təsərrüfatının inkişafı istiqamətində qarşıya
qoyulan məqsədə çatmaq üçün görülən işlər öz bəhrəsini vermişdir. Bu inkişafın
ən bariz nümunəsi isə rayonda əkilən taxıl sahəsidir. İldən-ilə artırılan taxıl
sahələrinin hektarı onu göstərir ki, rayonda kənd təsərrüfatının əsas qolu olan
taxılçılığa maraq yüksəlmiş və kəndlilər bu sahəsinin inkişafı üçün böyük səylə
çalışırlar. Rayon rəhbəri
qeyd edib ki, dövlət tərəfindən hər cür dəstəklə, texnika və lazım olan bütün
ləvazimatlarla təmin olunan fermerlər, sadə kənd adamları rayonda taxılçılığın
inkişafı üçün hər il daha çox maraq göstərirlər. Bunu rayonda
əkin aparılmış taxıl sahələrinin artan templə yüksəlməsindən də görmək olar.
2016-cı ildə 7820 hektar taxıl əkilmişdir ki, bunun 5559 hektarını buğda, 2261
hektarını arpa təşkil etmişdir. 2017-ci ildə 11039,8 hektar taxıl sahəsindən
8289,2 hektarında buğda, 2750,6 hektarında arpa əkilmişdir. 2018-ci ildə də
taxıl sahəsində uğurlu nəticələr əldə olunmuşdur. Bu il də taxıl əkilmiş
sahələr genişləndirilmiş və 12629 hektarda əkin aparılmışdır. 9102 hektarda
buğda, 3527 hektarda isə arpa əkilmişdir. Qarşıdan
2019-cu ilin payızlıq tarla əkini gəlir. Növbəti 2019-cu ildə də taxıl
sahələrinin genişləndirilməsi və 13180 hektarda taxıl səpini aparılması, 9400
hektarda buğda, 3780 hektarda isə arpa əkilməsi nəzərdə tutulmuşdur. İcra başçısı
görüş zamanı payızlıq tarla əkininə hazırlıqla bağlı görüləcək işlərdən və
qarşıda duran vəzifələrdən də danışıb. Bunun üçün rayonda kifayət qədər –
103 ədəd texnikanın olmasını qeyd edib. Gün ərzində 400-500 hektar sahədə şum
aparılmasının nəzərdə tutulduğu bildirib. Payızlıq əkin
sahələrinin vaxtında suvarılması, kəndlilərin suvarma suyu ilə yüksək səviyyədə
təmin olunması üçün hər il olduğu kimi, bu il də suvarma arx və kanallarının
təmizlənməsi və yaxın vaxtlarda işlərə başlanılacağını qeyd edən icra başçısı
ötən illərdə bu sahədə görülən işlərdən danışıb. Qeyd edib ki,
2017-ci ildə 269,71 km arx və kanalların təmizlənməsi nəzərdə tutulsa da 274,78
km məsafədə təmizlənmə işi aparılmışdır. 2018-ci ildə də 261,19 km
məsafəyə qarşı 302,44 km arx və kanallarda təmizlik işləri görülmüşdür.
Qarşıdan gələn 2019-cu ildə də 260 km məsafədə arx və kanallarda təmizlik
işlərinin aparılması nəzərdə tutulmuşdur. Lakin əvvəlki illərdə olduğu kimi,
2019-cu ildə bu rəqəmin də artacağını bildirib. İqtisadi cəhətdən gəlirli sahə hesab olunan
tütünçülüyün inkişafı üçün rayonda məqsədyönlü tədbirlər həyata keçirilir. Məhz
bunun nəticəsidir ki, 2016-cı ildə cəmi 10 hektar sahədə tütün əkilmişdisə, ötən
il bu rəqəmi 50 hektara çatdırıldı. Bütün aqrotexniki tədbirləri vaxtında həyata
keçirən tütünçülər göstərilən sahədən 80 tondan çox məhsul götürdülər. Əldə
etdikləri qazancdan razı qalan tütünçülər cari ildə əkin sahələrini daha 10
hektar artıraraq 60 hektara çatdırdılar. Bu məqsədlə rayonun Kosalar
kəndində 32 ha, Qazaxbəyli kəndində 8 ha, İkinci Şıxlı və Çaylı kəndlərində 1
ha, Birinci Şıxlı, Aşağı Salahlı, Hüseynbəyli, Daş Salahlı, Alpout kəndlərinin
hər birində 2 ha, Dəmirçilər kəndində 1,5 ha, Cəfərli kəndində 2,5 ha və
Fərəhli kəndində 4 ha sahədə tütün əkilməsi bu sahənin artan templə inkişaf
etdirilməsi deməkdir. Bildirilib ki, rayonda tütün dərimi uğurla davam
etdirilir. Tütünçülər bu günə kimi 134 ton yaş tütün tədarük ediblər. Eyni
zamanda, 4 tondan çox məhsulu isə "İlham-M” MMC-yə təhvil veriblər. Bundan
əlavə, dərimin vaxtında və itkisiz başa çatdırılması üçün məhsulu sahələrdə
hazırlanan xüsusi yerlərdə ipə düzərək qurudurlar. 2019-cu ildə də tütün
sahələrinin genişləndirilərək 70 hektar əraziyə çatdırılması nəzərdə
tutulmuşdur. Qazax rayonunda
kənd təsərrüfatının başqa sahələrində olduğu kimi, kartofçuluqda nümunəvi işlər
görülür. Hər il təhlükəli zərərvericilərə qarşı vaxtında aparılan kimyəvi
mübarizə tədbirləri nəticəsində fermerlər kartof əkilmiş sahələri
genişləndirərək bol məhsul yetişdirirlər. 2016-cı ildə 433 hektarda kartof əkən
sakinlər 2017-ci ildə bu sahəni 376,1 hektar artıraraq 809,10 hektara çatdırdılar.
Kartof becərən sakinlər bu sahənin gəlirli olduğunu nəzərə alaraq bu il əkin
sahələrini daha da genişləndiriblər. Bu il 1086,0 hektar sahədə kartof əkiblər.
Bu da ötən illə müqayisədə 276,9 hektar çoxdur. 2019-cu ildə isə kartof
sahələrinin 114 hektar artırılaraq 1200 hektara çatdırılması nəzərdə
tutulmuşdur. İcra başçısı bildirib ki, bu gün kənd təsərrüfatında
əldə edilən bütün uğurlar onu göstərir ki, yaradılan hər bir şərait, göstərilən
qayğı əhalinin maddi rifah halının yaxşılaşdırılmasına xidmət edir. Hər şeyin
kökündə vətəndaş amili dayanır. Kənd sakinlərindən Məhəbbət Adıgözəlov, Çoban
İsmayılov, Qurban Sanıyev, Qurban Məmmədov, Narıngül İsmayılova, Aftandil
Süleymanov, Bəhdəmir Kərimov və başqaları çıxış edərək rayonda həyata keçirilən
genişmiqyaslı tikinti-quruculuq işlərinə, Bala Çaylı kəndində yaşayan sakinlərə
göstərdiyi xüsusi diqqət və qayğıya görə rayon rəhbərliyinə öz dərin minnətdarlıqlarını
bildiriblər. Onlarla mütəmadi olaraq keçirilən səyyar
görüşləri yüksək qiymətləndirən kənd sakinləri minnətdarlıqla yanaşı, öz arzu və
istəklərini çatdırıb, onları narahat edən bir sıra məsələlərdən də söz açıblar.
Vətəndaşlar tərəfindən səsləndirilən kənddə işıq xəttinin qırılması, marşurutda
fasilələrin yaranması, artezian quyusunun qazılması və digər məsələləri dinləyən
rayon rəhbəri qaldırılan hər bir məsələyə diqqətlə baxılacağını bildirib. Bununla
bağlı aidiyyəti üzrə tapşırıq verib. İcra başçısı Rəcəb Babaşov görüşə yekun
vuraraq bildirib ki, Bala Çaylı kəndində yaşayan sakinlərə göstərilən diqqət və
qayğı bundan sonra da yüksək səviyyədə olacaqdır. GOYEZEN.AZ
Facebook-da paylaş