Qazax Gənclərin İnkişaf və Karyera Mərkəzinin könüllüləri Damcılı mağara düşərgəsinə ekskursiya ediblər
Qazax
Gənclərin İnkişaf və Karyera Mərkəzinin könüllüləri "Tarixdəki
İzimİZ" layihəsi çərçivəsində "Avey" Dövlət Tarix-Mədəniyyət
Qoruğu ərazisində yerləşən Damcılı mağara düşərgəsinə ekskursiya ediblər. Burada
gənclərə Qazaxdakı 3 dünya əhəmiyyətli abidədən biri olan Damcılı haqqında
ətraflı məlumat verilib. Bildirilib ki, Avey dağının cənub-şərqində yerləşən
Damcılı mağara düşərgəsi həm arxeoloji, həm də təbiət abidəsidir. Təbii
çatlardan süzülən su damcılarına görə Damcılı mağarası adlanır. Bu ərazidə ilk
dəfə 1953-1957-ci illərdə arxeoloq M.M.Hüseynov tərəfindən arxeoloji qazıntılar
aparılıb. Avey dağında daş dövrünə aid olan qədim insanların yaşadıqları 30-a
yaxın mağara aşkar edilib, iki minə yaxın alət tapılıb. Qeyd olunub ki, buradan
tapılan maddi nümunələr Damcılı mağarasında təxminən 80-100 min il bundan əvvəl
neandertal tipli ibtidai adamların məskən saldıqlarını əyani surətdə sübut
edib. Eyni zamanda mağarada əldə edilən əmək alətləri öz forma və hazırlanma
texnikasına görə aşağı paleolit, yuxarı paleolit və neolit dövrlərinə aid
edilir.
Gənclərə qoruq ərazisində aparılan qazıntı işləri
barədə də məlumat verilib. 2015-ci ilin yayında Mədəniyyət Nazirliyinin təşəbbüsü
ilə Yaponiyanın Tokio Universitetinin daş dövrü mütəxəssisi professor Yoşihiro Nişiakinin
rəhbərliyi ilə böyük bir heyətin Avey dağı ətəklərində kəşfiyyat xarakterli
axtarış aparmaq üçün qoruq ərazisinə dəvət olunduğu diqqətə çatdırılıb. Qeyd
olunub ki, həmin il 1 həftəlik axtarışdan sonra Avey dağında, Damcılı mağarası
və mağara düşərgəsinin ətrafında dünya əhəmiyyətli arxeoloji irsi kompleks
tədqiq etmək üçün 3 tərəfli beynəlxalq memorandum imzalanıb. Bu memorandum
Mədəniyyət Nazirliyi tərəfindən "Avey” Dövlət Tarix-Mədəniyyət qoruğu,
AMEA tərəfindən Arxeologiya və Etnoqrafiya İnstitutu, Yaponiya tərəfindən
Yaponiyanın Tokio Universiteti Universitet Muzeyi arasında bağlanıb.
Memoranduma əsasən ilk
arxeoloji qazıntılara 2016-cı ilin avqustunda "Avey” DTMQ-nun ərazisində
yerləşən dünya əhəmiyyətli Damcılı mağara düşərgəsində başlanılıb. İlkin
tədqiqatlar zamanı kəşfiyyat xarakterli 10-a yaxın müxtəlif istiqamətlərdə
qazıntı işləri aparılıb. Yaponiyalı və yerli arxeoloqların birgə işlədiyi
ərazinin 4 m dərinliyində qazıntı işləri aparılarkən orta əsrlərə, tunc dövrünün
sonuna aid, daha dərində isə neolit dövrü qalıqları, ocaq yerləri, fauna
nümunələri (sümüklər), təxminən yarım metr dərində lal təbəqədən aşağıda isə
orta paleolit dövrünün son mərhələsini əks etdirən qəlpə, nüvə tullantıları və
alət nümunələri əldə olunub. Damcılıda tapılan maddi-mədəniyyət nümunələrinin
dövrlərinin müəyyənləşməsi üçün Yaponiya laboratoriyalarına göndərilib. 2017-ci
il iyulunda 2-ci dəfə beynəlxalq ekspedisiya qoruq ərazisində qazıntılar aparıb.
Həmin il sadəcə bir quyu üzərində işlənərək 5 metrədək dərinlikdə aparılan
qazıntı işləri zamanı torpaq horizontal təbəqəyə bölünmüş, müxtəlif dövrlərə
aid nümunələr tapılıb. Üçtərəfli beynəlxalq memoranduma əsasən
Yaponiyanın Tokio Universitetinin əməkdaşları 2018-ci ilin iyulunda 3-cü dəfə
Damcılı mağara düşərgəsində qazıntı işlərini davam etdiriblər. Ötən ilin iyulunda isə artıq 4-cü dəfə imzalanmış həmin üçtərəfli beynəlxalq
memorandum əsasında növbəti qazıntı işləri aparılıb. Sonda
könüllülər qoruq ərazisində piknik ediblər. GOYEZEN.AZ
Facebook-da paylaş