Qazaxda "Gənc könüllü”lər Aprel şəhidi baş leytenant Elvin Namazovun xatirəsini doğum günündə yad ediblər
Azərbaycanın hərb tarixində 4 günlük müharibə və ya
Aprel döyüşləri kimi xatırlanan şanlı
tarixi qələbəmizin qazanılmasında Qazax rayonunun 3 nəfər igid oğlu - Fərəhli
kəndindən kapitan Orucov Mühüd Qurban oğlu, Yuxarı Salahlı kəndindən baş
leytenant Namazov Elvin Məmməd oğlu və Aslanbəyli kəndindən əsgər Əliyev Orxan
Məhəmməd oğlu da göstərdikləri igidliklərlə adlarını şəhidlik adı zirvəyə yazdırıblar. Bu gün 2016-cı ilin Aprel döyüşlərində qəhrəmancasına
şəhid olmuş, Xüsusi Təyinatlı Qüvvələrin baş leytenantı Elvin Məmməd oğlu
Namazovun doğum günüdür. Həmişə olduğu kimi, Qazax Gənclərin İnkişaf
və Karyera Mərkəzinin "Gənc Könüllülər"i öz ənənələrinə sadiq qalaraq
Yuxarı Salahlı kənd qəbiristanlığında şəhidin məzarını və ailəsini ziyarət ediblər.
Şəhidin məzarına gül dəstələri qoyub, ona olan
ehtiramlarını bildiriblər. Baş leytenant Elvin Namazov kimi qəhrəman
oğullarımızın keçdiyi döyüş yolunu hər zaman örnək götürdüklərini bildirən
gənclər bu cür ziyarətlərin mütəmadi olaraq təşkil olunacağını qeyd ediblər.
Aprel şəhidlərinin, eləcə də torpaqlarımızın ərazi bütövlüyü uğrunda canından
keçən bütün şəhidlərimizin xatirəsinin həmişə əziz tutulduğunu diqqətə
çatdırıblar. Məlumat üçün qeyd edək ki, Namazov Elvin Məmməd oğlu 7
sentyabr 1990-cı ildə Qazax rayonunun Yuxarı Salahlı kəndində anadan olmuş,
2007-ci ildə Zahid Mahmudov adına Yuxarı Salahlı kənd tam orta məktəbini
bitirmişdir. 2008-ci ildə Heydər Əliyev adına Azərbaycan Ali Hərbi Məktəbinə
daxil olmuş, 2012-ci ildə həmin ali məktəbi leytenant hərbi rütbəsində başa
vurmuşdur. 2013-cü ildə Silahlı Qüvvələrin Təlim və Tədris Mərkəzində bir illik
kurs keçdikdən sonra, 2014-cü ildən Müdafiə Nazirliyinin Xüsusi təyinatlılardan
ibarət "N” saylı hərbi hissəsində kəşfiyyat komandiri vəzifəsinə təyin
olunmuşdur. 2016-cı ildə ona baş leytenant hərbi rütbəsi verilmişdir. Elvin
Namazov 3 aprel 2016-cı il tarixdə Tərtər istiqamətində gedən döyüşlərdə erməni
ordusunun hücumunun qarşısının alınması zamanı baş verən şiddətli atışmada
qəhrəmancasına şəhid olmuşdur. 9 apreldə doğulub boya-başa çatdığı Yuxarı Salahlı
kənd qəbiristanlığında dəfn olunmuşdur. Elvin Namazov ölümündən sonra göstərdiyi qəhrəmanlığa
görə Respublika Prezidenti İlham Əliyevin 19 aprel 2016-cı il tarixli
Sərəncamına əsasən "Vətən uğrunda" medalı ilə təltif olunmuşdur. 2016-cı ildə Qazax şəhərinin mərkəzində adına bulaq
kompleksi tikilmişdir. Azərbaycan Respublikasının Prezidenti yanında
Qeyri-Hökumət Təşkilatlarına Dövlət Dəstəyi Şurasının maliyyə yardımı və
"Öyrədərək Öyrənirik" Gənclərin İntellektual İnkişafına Dəstək
İctimai Birliyinin təşkilatçılığı ilə icra olunan "Vətən üçün hazır
ol!" layihəsi çərçivəsində çəkilmiş "Qarabağa doğru" sənədli
filmi baş leytenant Elvin Namazov, kapitan Mühüd Orucov və əsgər Orxan Əliyevin
əziz xatirəsinə həsr olunmuşdur.
GOYEZEN.AZ
Facebook-da paylaş